نئی دہلی، 20مئی (یو این آئی) کانگریس نے الزام لگایا ہیکہ وزیر اعظم نریندر مودی کی قیادت والی مرکزی حکومت سچ کا سامنا کرنے سے ڈرتی ہے اور گزشتہ 12 برسوں میں اس نے جمہوریت کا آئینہ مانے جانے والے اپوزیشن اور میڈیا کی آواز کو دبانے کا کام کیا ہے ۔ کانگریس کے شعبہ مواصلات (کمیونیکیشن ڈپارٹمنٹ) کے سربراہ پون کھیڑا نے چہارشنبہ کو پارٹی ہیڈکوارٹر میں پریس کانفرنس میں کہا کہ مودی ملک میں اقتصادی بحران کیلئے عالمی جنگوں کو ذمہ دار ٹھہراتے ہیں لیکن سچ یہ ہے کہ ملک کی معیشت پہلے ہی سے چیلنجوں کا سامنا کررہی تھی اور کانگریس مسلسل اس کی وارننگ دیتی رہی ہے۔ انہوں نے کہاکہ جمہوریت میں اپوزیشن اور میڈیا وہ آئینہ ہوتے ہیں، جو اقتدار کو سچائی دکھاتے ہیں، لیکن سچ سے ڈرنے والی مودی حکومت اس آئینے کو توڑنے کا کام کر رہی ہے ۔ جھوٹ آئینے سے ڈرتا ہے ۔
