این سی پی تنازعہ
نئی دہلی: نیشنلسٹ کانگریس پارٹی( این سی پی) پر دعوے سے متعلق شرد پوار کی درخواست پر سپریم کورٹ کل یعنی پیر 19 فروری کوسماعت کرے گا۔ میڈیا کے مطابق جسٹس سریہ کانت، جسٹس دیپانکر دتّہ اور جسٹس کے وی وشوناتھن کی بنچ اس درخواست پر سماعت کر سکتی ہے۔واضح رہے کہ شرد پوار نے اجیت پوار گروپ کو نیشنلسٹ کانگریس پارٹی (این سی پی) کے طور پر الیکشن کمیشن کے ذریعے منظوری دیئے جانے کے فیصلے کو چیلنج کیا ہے۔ سپریم کورٹ نے 16 فروری کو اس درخواست کو فوری طور پر سماعت کی فہرست میں شامل کرنے پر رضامندی ظاہر کی تھی۔الیکشن کمیشن نے اجیت پوار کے گروپ کو اصل این سی پی قرار دیتے ہوئے اسے پارٹی کا نام اور نشان بھی دے دیا تھا۔ شرد پوار نے 17 فروری کو این سی پی معاملے میں الیکشن کمیشن اور مہاراشٹرا اسمبلی اسپیکر راہول نارویکر کے ذریعے دیئے گیے فیصلے کو انصاف کے برخلاف بتایا تھا۔اس ضمن میں شرد پوار نے کہا تھا کہ جس نے پارٹی بنائی تھی اسے ہی پارٹی سے نکال دیا گیا۔ ایسا پہلے کبھی نہیں ہوا۔ یہ فیصلہ عدالتی نظام کے مطابق درست نہیں تھا۔ یہ فیصلہ دینے سے قبل مہاراشٹرا اسمبلی کے اسپیکر راہول نارویکر نے دعویٰ کیا تھا کہ ان کے فیصلے سے جمہوریت مضبوط ہوگی اور 10ویں شیڈول پر بات ہوگی۔انہوں نے کہا تھا کہ میں نے آئین کی ہدایات، سپریم کورٹ کے فیصلوں اور 10ویں شیڈول کی دفعات کی بنیاد پر فیصلہ دیا ہے۔ میں نے اپنے فیصلے میں اس سے متعلق تمام فیصلوں کا حوالہ دیا ہے۔ خیال رہے کہ چیف الیکشن کمشنر راجیو کمار کی قیادت والی 3 رکنی ای سی آئی نے بھی کہا تھا کہ اجیت پوار کا گروپ ہی اصل این سی پی ہے اور اسے اپنا نام اور گھڑی کا نشان استعمال کرنے کا حق ہے۔ ای سی آئی نے اپنے اس فیصلے کی بنیاد اجیت پوار کے پاس اکثریت کا ہونا بتایا تھا۔