نئی دہلی، 3 نومبر (یو این آئی) الیکشن کمیشن نے واضح کیا کہ ووٹر لسٹ سے نام حذف ہونے کے بعد دوبارہ ووٹر کے طور پر اندراج کیلئے فارم 6 بھرنے والے افراد کے خلاف کسی طرح کی قانونی کارروائی نہیں کی جائے گی۔کمیشن نے کہا کہ اس کے علم میں آیا ہے کہ جن لوگوں کے نام ووٹر لسٹوں کی ایس آئی آر میں کسی وجہ سے حذف کر دیے گئے ہیں، وہ دوبارہ اندراج کیلئے فارم 6 بھرنے سے ہچکچا رہے ہیں، کیونکہ اس میں یہ اعلان کرنا پڑتا ہے کہ ان کا نام پہلی بار ووٹر لسٹ میں درج کیا جا رہا ہے ۔ ایسے لوگوں کا خیال ہے کہ فارم 6 میں اس طرح کا اعلان کرنا قانون کے مطابق درست نہیں ہوگا اور ان کے خلاف غلط بیانی کے الزام میں کارروائی ہو سکتی ہے ، کیونکہ وہ پہلے بھی ووٹر رہ چکے ہیں۔کمیشن نے کہا کہ فارم 6 میں یہ ضابطہ اگست 2022 سے نافذ ہے ۔ کمیشن کے مطابق، ووٹ دینے کی اہلیت رکھنے والے ایسے شہریوں کے نام اگر ووٹر لسٹ سے حذف ہو گئے ہیں اور وہ مسودہ فہرست میں بھی شامل نہیں ہیں تو وہ اپنے نام دوبارہ درج کرانے فارم 6 استعمال کر سکتے ہیں، بشرطیکہ وہ ملک میں کسی دوسری جگہ ووٹر کے طور پر رجسٹرڈ نہ ہوں۔کمیشن نے کہا کہ ایسے معاملات میں فارم 6 بھرنے والے افراد کے خلاف کوئی قانونی کارروائی نہیں کی جائے گی۔
