محبوب نگر 30جولائی(سیاست ڈسٹرکٹ نیوز )ضلع کلکٹر خوشبو گپتا نے سبھی سے ضلع میں منشیات کے استعمال اور سپلائی کو مکمل طور پر روکنے کے لیے ذمہ داری سے کام کرنے کی اپیل کی ہے۔ جمعرات کو، ا نھوں نے ضلع یس پی ڈی جانکی کی طرف سے پالامورو یونیورسٹی، انجینئرنگ، میڈیکل کالج کے نمائندوں کے ساتھ ساتھ مختلف کالجوں کے پرنسپلوں، پولیس، ایکسائز، ایجوکیشن اور دیگر عہدیداروں کے ساتھ کلکٹریٹ کانفرنس ہال میں منشیات سے متعلق آگاہی میٹنگ سے خطاب کیا۔کلکٹر نے مشورہ دیا کہ طلباء میں منشیات کے استعمال کی علامات کی نشاندہی کرنے کے لیے اساتذہ، وارڈنز اور سیکورٹی اہلکاروں کو آگاہ ہونا چاہیے۔ انہوں نے کہا کہ طلباء کی طرف سے ہاسٹلز میں لائے گئے تھیلوں کی ضرورت پڑنے پر چیکنگ کی جائے اور رات کے وقت ہاسٹل کے کمروں کی سرپرائز چیکنگ کی جائے۔ ضلع ایس پی ڈی جانکی* نے کہا کہ اگر منشیات کے استعمال کے بارے میں معلومات موصول ہوتی ہیں تو متعلقہ افراد کا طبی معائنہ کیا جائے گا اور اگر ضرورت پڑی تو انہیں ڈی ایڈکشن سینٹرز میں بھیجا جائے گا۔ انہوں نے کہا کہ اگر ابتدائی مرحلے میں شناخت اور علاج کر لیا جائے تو نوجوانوں کو معمول کی زندگی میں واپس لایا جا سکتا ہے۔ انہوں نے زور دیا کہ منشیات پر قابو پانا صرف محکمہ پولیس کی ذمہ داری نہیں ہے بلکہ ہر شہری کو معلومات فراہم کرنے میں شراکت دار بننا چاہیے۔ انہوں نے کہا کہ ضلع کو منشیات سے پاک محبوب نگر بنانے کے لیے سب کے تعاون کی ضرورت ہے۔ڈسٹرکٹ لیگل سروسز اتھارٹی (DLSA) کے سکریٹری ڈی اندرا نے کہا کہ نیشنل لیگل سروسز اتھارٹی (NALSA) کے ذریعہ منشیات کے خاتمے کے لیے وسیع پیمانے پر بیداری پروگرام چلائے جا رہے ہیں۔ اس میٹنگ میں اسسٹنٹ کلکٹر انڈر ٹرینی سائی شیوانی، مختلف کالجوں کے پرنسپل، انجینئرنگ اور میڈیکل کالجوں کے نمائندوں، پولیس اور محکمہ ایکسائز کے افسران اور دیگر نے اس میٹنگ میں شرکت کی۔
