ممبئی: مہاراشٹرا میں 288 اسمبلی حلقوں کے لیے داخل کیے گئے 7,994 امیدواروں کے کاغذات نامزدگی جانچ کے بعد درست پائے گئے۔ ریاست کے چیف الیکٹورل آفیسر (سی ای او) کے دفتر نے ایک بیان میں کہا کہ 921 امیدواروں کے کاغذات نامزدگی غلط پائے گئے۔ دراصل، مہاراشٹرا میں امیدواروں کے کاغذات نامزدگی داخل کرنے کا عمل 22 اکتوبر کو شروع ہوا تھا۔ نامزدگی کا عمل 29 اکتوبر 2024 کو ختم ہوا۔مہاراشٹرا کے انتخابی عہدیداروں نے 30 اکتوبر کو کاغذات نامزدگی کی جانچ کی۔ جبکہ کاغذات نامزدگی واپس لینے کی آخری تاریخ 4 نومبر ہے۔مہاراشٹرا میں 288 رکنی ریاستی اسمبلی کے لیے ووٹنگ 20 نومبر کو ہوگی اور نتائج کا اعلان 23 نومبر کو کیا جائے گا۔ اقتدار کے لیے اصل مقابلہ حکمران جماعتوں کے اتحاد مہایوتی اور اپوزیشن جماعتوں کے اتحاد مہا وکاس اگھاڑی کے درمیان ہے۔ تاہم چھوٹی جماعتیں اور آزاد امیدوار بھی انتخابی میدان میں ہیں۔مہایوتی اتحاد میں بھارتیہ جنتا پارٹی (بی جے پی)، شیوسینا اور نیشنلسٹ کانگریس پارٹی (این سی پی) شامل ہیں۔ جب کہ اپوزیشن جماعتوں کے اتحاد مہا وکاس اگھاڑی میں کانگریس، شیو سینا (ادھو بالا صاحب ٹھاکرے) اور این سی پی (شرد چندر پوار) شامل ہیں۔ریاستی الیکشن کمیشن کے مطابق مہاراشٹرا میں 20 نومبر 2024 کو ہونے والے اسمبلی انتخابات میں ووٹ ڈالنے کے اہل 9.7 کروڑ سے زیادہ ووٹروں میں سے 100 سال یا اس سے زیادہ عمر کے ووٹروں کی تعداد 47,392 ہے۔
مہاراشٹرا کے چیف الیکٹورل آفیسر کے ذریعہ شیئر کردہ اعداد و شمار کے مطابق، 18-19 سال کی عمر کے 22,22,704 ووٹر ہیں۔ جبکہ 100 سال یا اس سے زیادہ عمر کے ووٹرز (زیادہ سے زیادہ 109 سال) 47,392 ہیں۔ مہاراشٹرا میں 9,70,25,119 رجسٹرڈ ووٹر ہیں جن میں 5,00,22,739 مرد ووٹر اور 4,69,96,279 خواتین ووٹر شامل ہیں۔ اس کے علاوہ 6,101 تیسری جنس کے ووٹر ہیں۔ عیاں رہے کہ مہاراشٹرا کی 288 اسمبلی سیٹوں کے لیے 20 نومبر کو ووٹنگ ہوگی اور نتائج کا اعلان 23 نومبر کو کیا جائے گا۔
