نئی دہلی، 15 مئی (یو این آئی) وزیرِاعظم نریندر مودی مغربی ایشیا کے بحران کے پیشِ نظر توانائی کی سلامتی کو مضبوط بنانے کے اہم ایجنڈے کے ساتھ جمعہ کے روز چھ روزہ غیر ملکی دورے پر روانہ ہو گئے ہیں۔ اس دورے میں وہ یو اے ای سمیت چار یورپی ممالک ناروے ، سویڈن، نیدرلینڈ اور اٹلی کا دورہ کریں گے ۔ اس دورے کے دوران وزیرِاعظم کی خاص توجہ توانائی کی سلامتی پر ہوگی، جبکہ تجارت، سرمایہ کاری اور اسٹریٹجک تعاون کو فروغ دینے پر بھی بات چیت کی جائے گی۔ وہ ان تمام ممالک کی اعلیٰ قیادت کے ساتھ دوطرفہ ملاقاتیں کریں گے ۔ اپنے دورے کے پہلے مرحلے میں وزیرِ اعظم یو اے ای پہنچیں گے ، جہاں وہ صدر شیخ محمد بن زاید النہیان سے ملاقات کریں گے ۔ اس ملاقات میں توانائی کے شعبے میں تعاون سمیت دوطرفہ، علاقائی اور بین الاقوامی امور پر تبادلۂ خیال ہوگا۔ ذرائع کے مطابق یو اے ای کے ساتھ توانائی کی سلامتی کے حوالے سے کم از کم دو اہم معاہدے متوقع ہیں۔ دورے کے دوسرے مرحلے میں وزیرِ اعظم 15 سے 17 مئی تک نیدرلینڈز کے سرکاری دورے پر رہیں گے ، جو 2017 کے بعد ان کا دوسرا دورہ ہوگا۔ اس دوران وہ نیدرلینڈز کے بادشاہ ولیم -الیکزینڈر اور ملکہ میکسیما سے ملاقات کریں گے اور وزیرِ اعظم روب جیٹن کے ساتھ بات چیت کریں گے ۔
