نئی دہلی: مرکزی پبلک سیکٹر انڈر ٹیکنگ کمپنی انڈین میڈیسن فارماسیوٹیکل کارپوریشن لمیٹڈ (آئی ایم پی سی ایل) نے آیوش کی وزارت اور حکومت اتراکھنڈ کو 10.3 کروڑ روپے منافع دینے کا اعلان کیا ہے ۔کمپنی کے عہدیداروں نے جمعرات کو یہاں ایک تقریب میں آیوش کی وزارت کا 9.93 کروڑ روپے کا ڈیویڈنڈ چیک وزیر آیوش سربانند سونووال کو سونپا۔اس موقع پر بات کرتے ہوئے مسٹر سربانند سونووال نے کہاکہ آئی ایم پی سی ایل نے گزشتہ مالی سال 2020-21 کے مقابلے اپنے منافع میں شاندار اضافہ درج کیا ہے ، جو کہ ایک قابل ستائش کامیابی ہے ۔آیوش کے وزیر مملکت برائے آیوش منجپارہ مہندر بھائی، اسپیشل سکریٹری وزارت آیوش پرمود کمار پاٹھک، یوگا اور نیچروپیتھی سیل، آیوش کی وزارت کے ڈائرکٹر وکرم سنگھ، آیوروید کے مشیر اور آئی ایم پی اے سی ایل کے منیجنگ ڈائریکٹر ڈاکٹر مکیش کمار، آئی ایم پی اے سی ایل کے اسسٹنٹ ڈائریکٹر جنرل (ایف اینڈ اے ) اروند کمار اگروال اور دیگر افراد تقریب میں موجود تھے ۔کمپنی مختلف بیماریوں کے لیے 657 قدیم آیورویدک، 332 یونانی اور 71 ٹریڈ مارک والی دوائیں تیار کرتی ہے ۔
