رام پور: اتر پردیش کے رام پور کے ایم پی ایم ایل اے کورٹ نے سماج وادی پارٹی (ایس پی) کے قدآور رہنما محمد اعظم خان کی اہلیہ ڈاکٹر تزئین فاطمہ اور بیٹے عبداللہ اعظم رکن اسمبلی کے خلاف جاری کیے گئے غیر ضمانتی وارنٹ کو منسوخ کر دیا ہے، اور دونوں کو عدالت کے ذریعہ مقرر کردہ ہر تاریخ پر پیش ہونے کے احکامات دیئے ہیں۔ایم پی ایم ایل اے عدالت نے چہارشنبہ کو ڈاکٹر فاطمہ اور عبداللہ اعظم کے خلاف ناقابل ضمانت وارنٹ جاری کیے تھے، جس کے بعد ماں اور بیٹا 24 گھنٹے کے اندر عدالت میں پیش ہوئے۔ ساتھ ہی انہوں نے پیش نہ ہونے کی وجہ صحت بھی بتائی، جس کی وجہ سے ایم پی ایم ایل اے کورٹ نے مشروط ضمانت دیتے ہوئے غیر ضمانتی وارنٹ کو منسوخ کر دیا۔ اس کے ساتھ ہی انہیں ہر تاریخ پر پیش ہونے کا حکم دیا گیا ہے۔اعظم خان کی اہلیہ ڈاکٹر تزئین فاطمہ اور ان کے بیٹے سوار ٹانڈہ کے ایم ایل اے عبداللہ اعظم کو عدالت نے مشروط ضمانت دے دی ہے۔ اس کے ساتھ گزشتہ روز جاری کیے گئے غیر ضمانتی وارنٹ بھی واپس کر دیئے گئے ہیں۔ ڈاکٹر تزئین فاطمہ اور عبداللہ اعظم آج صبح عدالت میں پیش ہوئے۔اس دوران انہوں نے گزشتہ تاریخوں پر عدالت میں پیش نہ ہونے کی وجہ ذاتی صحت کو بتایا۔ اس کے ساتھ دیگر وجوہات بھی بتائیں اور اس سے متعلق دستاویزات بھی پیش کیے۔ عدالت نے دونوں سے ایک ایک لاکھ روپے کے مچلکے بھی بھروائے ہیں۔ اس کے علاوہ عبداللہ کو ہر تاریخ پر جبکہ ڈاکٹر تزئین فاطمہ کو عدالت کے بلائے جانے پر پیش ہونا پڑے گا۔
