نئی دہلی: ہندوستان نے جمعہ کو کہا کہ صنعت کار گوتم اڈانی اور ان کے ساتھیوں کے خلاف رشوت ستانی کے الزامات میں امریکی محکمہ انصاف کی طرف سے داخل کی گئی چارج شیٹ نجی فرموں اور کچھ افراد اور وہاں کے محکمہ انصاف سے جڑا قانونی معاملہ ہے اور حکومت کو اس معاملے پر کوئی پیشگی اطلاع نہیں دی گئی تھی۔ والوں کا جواب دیتے ہوئے وزارت خارجہ کے ترجمان نے کہا، یہ نجی فرموں اور کچھ افراد اور امریکی محکمہ انصاف سے جڑا ہوا قانونی معاملہ ہے ۔ ایسے معاملات میں کچھ قانونی عمل اور طریقہ کار ہوتے ہیں، جن پر ہمیں یقین ہے کہ ان پر عمل کیا جائے گا۔ حکومت ہند کو اس معاملے پر پیشگی اطلاع نہیں دی گئی تھی۔سمن اور وارنٹ گرفتاری پر عمل درآمد کیلئے کسی غیر ملکی حکومت کی طرف سے کی گئی کوئی بھی درخواست باہمی قانونی تعاون کے تحت آتی ہے ۔
ایسی درخواستوں کی جانچ میرٹ پر کی جاتی ہے ۔ “ہمیں اس (اڈانی) معاملے میں امریکی فریق سے (تعاون کی) کوئی درخواست موصول نہیں ہوئی ہے ۔” ترجمان نے کہا کہ اڈانی اور ان کے سات ساتھیوں بشمول ان کے بھتیجے ساگر اڈانی پر محکمہ انصاف نے سیکورٹیز اور وائر فراڈ کرنے کی سازش کا الزام لگایا ہے ۔ محکمہ انصاف کی فرد جرم میں الزام لگایا گیا ہے کہ مدعا علیہان نے ہندوستان میں قابل تجدید توانائی کے منافع بخش ٹھیکے حاصل کرنے کے لیے ہندوستانی حکومت کے اہلکاروں کو رشوت دینے پر اتفاق کیا تھا۔ تاہم، اڈانی گروپ نے اپنے خلاف الزامات کی تردید کی ہے ، انہیں “بے بنیاد” قرار دیا ہے اور قانونی ذرائع سے ان کا بھرپور مقابلہ کرنے کی بات کہی ہے ۔
