ٹیلی ویژن فوٹیج اور سوشل میڈیا کلپس میں زور دار دھماکے کو سڑک پر پھٹتے ہوئے دکھایا گیا، جس نے آس پاس موجود کئی شہریوں کو بھی اپنی لپیٹ میں لے لیا۔
کراچی: پاکستان کے شورش زدہ صوبہ بلوچستان میں منگل کو نیم فوجی دستوں کے خلاف بم حملے میں کم از کم 10 افراد ہلاک اور 30 سے زائد زخمی ہوگئے۔
یہ دھماکہ صوبے کے دارالحکومت کوئٹہ میں فرنٹیئر کانسٹیبلری (ایف سی) کے ہیڈ کوارٹر کے قریب ایک مصروف گلی میں ہوا۔
بلوچستان کے وزیر صحت بخت محمد کاکڑ نے حملے کی تصدیق کی ہے۔ انہوں نے میڈیا کو بتایا، “دھماکے میں دس افراد ہلاک جبکہ 32 زخمی ہوئے ہیں۔”
زخمیوں کو شہر کے مختلف اسپتالوں میں پہنچایا گیا، جہاں ایمرجنسی نافذ کردی گئی۔
سیکریٹری صحت مجیب الرحمان کے ایک بیان کے مطابق، “کوئٹہ کے سول اسپتال، بلوچستان میڈیکل کالج (بی ایم سی) اسپتال کوئٹہ اور ٹراما سینٹر میں ایمرجنسی نافذ کردی گئی ہے۔”
ٹیلی ویژن فوٹیج اور سوشل میڈیا کلپس میں زور دار دھماکے کو سڑک پر پھٹتے ہوئے دکھایا گیا، جس نے آس پاس موجود کئی شہریوں کو بھی اپنی لپیٹ میں لے لیا۔
اگرچہ کسی گروپ نے دھماکے کی ذمہ داری قبول نہیں کی ہے، لیکن بلوچ باغی گروپ اکثر صوبے میں سیکیورٹی اہلکاروں کو نشانہ بناتے ہوئے حملے کرتے رہتے ہیں۔
وزیراعلیٰ بلوچستان میر سرفراز بگٹی نے واقعے کی شدید مذمت کرتے ہوئے اسے ’دہشت گردانہ حملہ‘ قرار دیا۔
انہوں نے ایکس پر ایک بیان میں کہا، “دہشت گرد بزدلانہ کارروائیوں کے ذریعے قوم کے عزم کو کمزور نہیں کر سکتے۔ عوام اور سکیورٹی فورسز کی قربانیاں رائیگاں نہیں جائیں گی۔ ہم بلوچستان کو پرامن اور محفوظ بنانے کے لیے پرعزم ہیں۔”
ایران اور افغانستان کی سرحد سے متصل بلوچستان ایک طویل عرصے سے جاری پرتشدد شورش کا گھر ہے۔
تیل اور معدنیات سے مالا مال اس صوبے میں بلوچ باغی گروہ اکثر سیکورٹی اہلکاروں، سرکاری منصوبوں اور 60 بلین امریکی ڈالر کے چین پاکستان اقتصادی راہداری (سی پی ای سی) کے منصوبوں کو نشانہ بناتے ہوئے حملے کرتے رہتے ہیں۔