نئی دہلی: عام آدمی پارٹی (عاپ) کے سینئر لیڈر اور کابینہ کے وزیر سوربھ بھاردواج نے جمعرات کو دہلی کے لوگوں سے ‘‘ووٹ دے کر جیل کا جواب’ دینے کی اپیل کی ہے ۔ سومناتھ بھارتی نے کارکنوں کے ساتھ میٹرو اسٹیشن جانے والے لوگوں میں پمفلٹ تقسیم کیے اور ان سے اپیل کی کہ وہ ملک سے آمرانہ حکومت کو ہٹانے کے لیے 25 مئی کو ہونے والے آئندہ انتخابات میں اپنے ووٹ کا استعمال کریں۔ بھاردواج نے کہا کہ دہلی کے عوام اپنے مقبول وزیر اعلی اروند کجریوال کو جیل بھیجے جانے سے بہت افسردہ ہیں۔ لوگوں نے فیصلہ کیا ہے کہ وہ اپنے ووٹ کی طاقت سے بی جے پی کو جواب دیں گے ۔انہوں نے کہا کہ دہلی میں ایک ماہ بعد لوک سبھا انتخابات ہیں۔آپ دہلی کے لوگوں تک اپنا پیغام پہنچانے کے لیے مختلف طریقے استعمال کر رہی ہے ۔ آج ہم نئی دہلی لوک سبھا سیٹ کے امیدوار کے ساتھ میٹرو اسٹیشنوں پر پمفلٹ تقسیم کر رہے ہیں اور لوگوں سے اپیل کر رہے ہیں کہ وہ ووٹ دے کر جیل کا جواب دیں۔عاپ لیڈر نے کہاکہ آج دہلی کے لوگ بہت غمگین ہیں کہ ان کے سب سے مقبول وزیر اعلیٰ کو جیل میں ڈال دیا گیا ہے ۔ دہلی کے لوگ یہ جواب بی جے پی اور مرکزی حکومت کو دینا چاہتے ہیں۔‘آپ’ اور دہلی کے لوگوں نے فیصلہ کیا ہے کہ ہم ‘جیل کا جواب ووٹ سے دیں گے ۔ اپنے ووٹوں کی طاقت سے ہم بی جے پی کو بتائیں گے کہ اس نے جو کچھ کیا وہ غلط تھا۔
