سری نگر/سہارن پور: اتر پردیش پولیس نے ریاست کے دیوبند میں 1993 میں ہونے والے دھماکے کے مرکزی ملزم نذیر احمد وانی کو جموں و کشمیر کے بڈگام ضلع سے گرفتار کیا ہے۔ حکام نے منگل کو یہ اطلاع دی۔ انہوں نے بتایا کہ وانی کو اتر پردیش پولیس ٹیم نے جموں و کشمیر پولیس کی مدد سے گرفتار کیا تھا۔ وانی نے حال ہی میں جموں و کشمیر اسمبلی کے انتخابات بڈگام اسمبلی سیٹ سے وزیر اعلیٰ عمر عبداللہ کے خلاف لڑے تھے، لیکن ہار گئے۔ وانی (51) نے انتخابی حلف نامے میں اپنے پیشے کو کاروبار کے طور پر بیان کیا تھا۔ تاہم انہوں نے اپنے انتخابی حلف نامے میں دیوبند دھماکے کے کیس کا ذکر نہیں کیا۔ دوسری جانب سہارنپور کے سپرنٹنڈنٹ آف پولیس (دیہی) ساگر جین نے کہا کہ اے ٹی ایس اور دیوبند پولیس کی مشترکہ کارروائی میں دیوبند میں بم دھماکوں کے ملزم کو جموں و کشمیر سے گرفتار کیا گیا۔ وہ پچھلے 31 سالوں سے مختلف جگہوں پر سب کو چکمہ دے کر اور اپنا نام اور لباس بدل کر رہ رہے ہیں۔
