نئی دہلی 13 جون ( سیاست ڈاٹ کام ) کانگریس کی جانب سے یہ واضح کئے جانے کے بعد کہ راہول گاندھی ہی پارٹی صدر رہیں گے سینئر لیڈر ہریش راوت نے آج کہا کہ اس بیان سے پارٹی ورکرس کے جذبات کی عکاسی ہوئی ہے جو سمجھتے ہیں کہ راہول گاندھی کی قیادت ہی میں پارٹی شکست سے کامیابی کا سفر طئے کرسکتی ہے ۔ پارٹی کے ترجمان اعلی رندیپ سرجیوالا نے کل کہا تھا کہ راہول گاندھی پارٹی کے صدر ہیں اور رہیںگے ۔ سرجیوالا نے اس طرح کئی دن سے جاری قیاس آرائیوں کو ختم کردیا تھا کہ آیا راہول گاندھی صدارتی عہدہ پر برقرار رہیں گے یا نہیں۔ ہریش راوت نے کہا کہ وہ یہ واضح کرنا چاہتے ہیں کہ مسٹر سرجیوالا نے کل جو کچھ بھی کہا تھا وہ پارٹی کارکنوں کے جذبات کی عکاسی ہے جو یہ یقین رکھتے ہیں کہ راہول گاندھی کی قیادت میں ہی پارٹی شکست سے کامیابی تک کا سفر طئے کرسکتی ہے ۔ انہوں نے کہا کہ ہم اس بار کامیاب نہیں ہوئے ہیں لیکن تنظیم کو مستحکم کرتے ہوئے ہم آر ایس ایس ۔ بی جے پی کو ایک نیا چیلنج دے سکتے ہیںاور کامیاب ہوسکتے ہیں۔ ایک اور پریس کانفرنس میں کانگریس ترجمان ابھیشیک مانو سنگھوی نے بھی سرجیوالا کے خیال کی حمایت کی تھی اور کہا تھا کہ کانگریس قیادت میں کوئی تبدیلی نہیں ہوگی اور راہول صدارت پر برقرار رہیں گے ۔
