ممبئی، 24 جون (آئی اے این ایس) اداکارہ راشی کھنہ نے اپنی آنے والی فلم دھرمن میں سوپر اسٹار رجنی کانت اور معروف اداکار و فلم سازکمل ہاسن کے ساتھ کام کرنے کے موقع کو اپنے لیے اعزاز قرار دیتے ہوئے کہا ہے کہ حقیقی عظمت صرف صلاحیت کا نام نہیں بلکہ نظم و ضبط، انکساری اور فن سے لازوال محبت کا نتیجہ ہوتی ہے۔ہدایت کار اشوتھ ماریموتھو کی اس فلم کو کمل ہاسن کے پروڈکشن ہاؤس راج کمل فلمز انٹرنیشنل کے بینر تلے تیارکیا جا رہا ہے۔ راشی کھنہ نے فلم کی مہورت تقریب کی چند تصاویر انسٹاگرام پر شیئرکرتے ہوئے لکھا کہ سینما کے عظیم فنکاروں کے ساتھ وقت گزارنا اس بات کی یاد دہانی ہے کہ عظمت صرف صلاحیت میں نہیں بلکہ مستقل مزاجی، عاجزی اور اپنے فن سے گہری وابستگی میں پوشیدہ ہوتی ہے۔ انہوں نے کہا کہ وہ ان یادگار گفتگوؤں، محبت بھرے ماحول اور اس منفرد فلم کا حصہ بننے کے موقع پر بے حد شکرگزار ہیں۔ فلم سازوں نے حال ہی میں اعلان کیا تھا کہ رجنی کانت کی فلم، جسے پہلے تھلائیور 173 کے نام سے جانا جا رہا تھا، اب دھرمن کے عنوان سے ریلیز ہوگی۔ اس موقع پر فلم کا فرسٹ لک پوسٹر بھی جاری کیا گیا، جس میں رجنی کانت ایک اسٹائلش ڈاکٹرکے روپ میں نظر آئے۔ طبی لباس میں ملبوس رجنی کانت کے ہاتھ میں جراحی کے آلات دکھائے گئے ہیں جبکہ پوسٹر پر دی ڈیڈلی ڈاکٹرکا ٹیگ لائن بھی درج ہے۔دوسری جانب راشی کھنہ ہدایت کار انیس بزمی کی ایک بے نام کامیڈی فلم میں بھی کام کر رہی ہیں، جس میں اکشے کمار اور ودیا بالن مرکزی کردار ادا کر رہے ہیں۔ان کی آنے والی فلموں میں وکرانت میسی کے ساتھ تلخوں میں ایک اور آر مادھون کے ہمراہ برج بھی شامل ہیں۔ اس کے علاوہ راشی مقبول ویب سیریز فرضی کے دوسرے سیزن میں بھی میگھا ویاس کے کردار کو دوبارہ نبھائیں گی، جس میں شاہد کپور اور وجے سیتھوپتی مرکزی کرداروں میں نظر آئیں گے۔
