جے پور، 26 اگست ( یو این آئی) راجستھان ہائی کورٹ نے گزشتہ چار ماہ سے جیل میں بند سابق وزیر مہیش جوشی کی ضمانت کی درخواست منگل کو مسترد کر دی۔جج پرویر بھٹناگر کی عدالت نے 8 اگست کو فریقین کے دلائل مکمل ہونے کے بعد فیصلہ محفوظ کر لیا تھا۔ ای ڈی نے مہیش جوشی کو 24 اپریل کو جل جیون مشن گھوٹالے میں منی لانڈرنگ کیس میں گرفتار کیا تھا۔ تب سے وہ جیل میں قید ہیں۔ ای ڈی معاملات کی خصوصی عدالت سے ضمانت مسترد ہونے کے بعد انہوں نے ہائی کورٹ میں ضمانت کی درخواست کی تھی۔اس سے پہلے ، مہیش جوشی کی طرف سے بحث کرتے ہوئے ، سینئر وکیل وویکراج باجوہ نے کہا کہ اس معاملے میں درخواست گزار کو فریم کیا گیا ہے ۔ درخواست گزار کا نام اے سی بی میں درج اصل ایف آئی آر میں نہیں ہے ۔ درخواست گزار کو ایک سال قبل نوٹس دیا گیا تھا۔ اس کے بعد حالات میں تبدیلی کے بغیر انہیں گرفتار کر لیا گیا۔ ضمانت کی مخالفت کرتے ہوئے ای ڈی کے وکیل اکشے بھاردواج نے عدالت کو بتایا کہ اس معاملے میں اے سی بی کی طرف سے دائر کی گئی دوسری ایف آئی آر میں درخواست گزار کے کردار کا ذکر کیا گیا ہے ۔
