ریاض: سعودی وزارت خارجہ نے کہا ہے کہ جن ممالک سے پروازوں پر پابندی عائد ہے وہاں کے شہریوں کے وزٹ ویزوں میں توسیع کی گئی ہے۔ میڈیا کے مطابق ان ممالک کے شہریوں کے وزٹ ویزوں میں توسیع مفت کی گئی ہے۔وزارت نے کہا ہے کہ ’وزٹ ویزوں میں توسیع خادم حرمین شریفین شاہ سلمان بن عبد العزیز کی ہدایت پر کی گئی ہے‘۔وزارت نے کہا ہے کہ ’مذکورہ ممالک کے شہریوں کے لیے وزٹ ویزے میں خود کار طریقے کے مطابق 30 نومبر2021 تک توسیع کی گئی ہے‘۔’وزٹ ویزہ ہولڈر جنہوں نے اپنے ای میل کا اندراج کر رکھا ہے انہیں توسیع کے متعلق مطلع کردیا گیا ہے‘۔وزارت نے کہا ہے کہ ’وزٹ ویزوں میں مفت توسیع کورونا وائرس کے باعث پیدا ہونے والے بحران کے ما بعد اثرات کم کرنے کے لیے ہے‘۔’اس سے وہ لوگ مستفید ہوں گے جنہیں پہلے سے وزٹ ویزے جاری کئے گئے ہیں مگر پروازوں کی معطلی کے باعث وہ سعودی عرب نہیں آسکے‘۔
