ہندو مہا سبھا کو جھٹکہ‘ ، راج شری کیخلاف وارنٹ جاری
متھرا :گزشتہ دنوں آل انڈیا ہندو مہاسبھا نے اعلان کیا تھا کہ اس کے کارکنان 6 دسمبر کو بڑی تعداد میں شاہی مسجد عیدگاہ پہنچیں گے جہاں ہنومان چالیسا کا پاٹھ کیا جائے گا۔ ساتھ ہی لڈو گوپال کا جل ابھشیک کیے جانے کا اعلان بھی کیا گیا تھا۔ ہندو مہاسبھا لیڈران و کارکنان کے ذریعہ سوشل میڈیا پر اس سلسلے میں لگاتار پوسٹ بھی کیے جا رہے ہیں۔ اب اس تعلق سے انتظامیہ نے سخت رویہ اختیار کر لیا ہے۔ سٹی مجسٹریٹ کورٹ نے ہندو مہاسبھا کی قومی صدر راج شری کے خلاف ضمانتی وارنٹ جاری کیا ہے۔قابل ذکر ہے کہ تین دن قبل ہی ہندو مہاسبھا کی قومی صدر راج شری کے ساتھ ساتھ کچھ دیگر لوگوں پر ماحول خراب کرنے کا الزام عائد کرتے ہوئے نوٹس جاری کیا گیا تھا۔ اب سٹی مجسٹریٹ عدالت کے ذریعہ راج شری کے خلاف ضمانتی وارنٹ جاری کیے جانے سے اس ہندوتوا تنظیم کو زوردار جھٹکا لگا ہے۔ بتایا جا رہا ہے کہ انتظامیہ اب ان لوگوں کی بھی پہچان کرنے میں مصروف ہے جو سوشل میڈیا پر جل ابھشیک کو لے کر اشتعال انگیز پوسٹ ڈال رہے ہیں۔واضح رہے کہ دو دن قبل ہندو مہاسبھا کے قومی ترجمان سنجے جاٹ اور سَنت یوراج کے خلاف اشتعال انگیز پوسٹ ڈالنے پر کوتوالی اور گووند نگر تھانہ میں رپورٹ درج کی گئی تھی۔ پولیس نے گزشتہ دنوں شری کرشن جنم استھان پر دَرشن کرنے آئیں ہندو مہاسبھا کی قومی صدر راج شری چودھری، چندرپرکاش سنگھل، وشنو سنگھ، دنیش شرما، مکیش سنگھ، اوم شنکر، سنجیو کمنار، رونق ٹھاکر، سنجے جاٹ، دھرمیندر پنڈت، گوری پاٹھک کے ساتھ ہی اقبال، یوسف، کلو اور تامل کے نام نوٹس جاری کیا تھا۔دوسری طرف ہندو مہاسبھا کے خازن دنیش شرما کا کہنا ہے کہ تنظیم 6 دسمبر کو شاہی مسجد عیدگاہ میں ہنومان چالیسا کا پاٹھ کرے گی۔ اس میں شامل ہونے کے لیے ملک بھر سے بڑی تعداد میں لوگ جمع ہو رہے ہیں۔
