حیدرآباد۔ ایک حیرت انگیز واقعہ میں کورونا سے متاثر 10 مریض عادل آباد کے راجیو گاندھی میڈیکل سائینسیس انسٹی ٹیوٹ سے فرار ہوگئے ۔ یہ واقعہ یکم اگسٹ کی رات پیش آیا ۔ کہا گیا ہے کہ کورونا مریضوں کا الزام تھا کہ وہاں ان کا خیال نہیں رکھا جا رہا ہے اور ان کی بے عزتی کی جا رہی ہے ۔ کہا گیا ہے کہ ڈاکٹرس اور نیم طبی عملہ کی جانب سے ہتک کئے جانے اور علاج میں لاپرواہی سے تنگ آ کر یہ مریض دواخانہ سے فرار ہوگئے ہیں۔ ان کا تعلق کیلاش نگر ‘ ٹیچرس کالونی نظام آبد ‘ کوٹا کمار واڑی ‘ دوارکا نگر اندرا ویلی اور خانہ پور سے بتایا گیا ہے ۔ طبی اور پولیس عملہ نے بتایا کہ تین مریضوں کی شناخت ہوچکی ہے اور دو کو واپس دواخانہ بھی لالیا گیا ہے ۔ ایک اور مریض کو گھر میں آئسولیشن کی اجازت دیدی گئی ہے ۔ قبل ازیں ایک ویڈیو جاری کرتے ہوئے رمس ہاسپٹل میں شریک مریضوں نے شکایت کی تھی کہ ان کے ساتھ اچھا سلوک نہیں کیا جا رہا ہے ۔ وہاں طبی نگہداشت کی بھی کمی ہے اور سہولیات دستیاب نہیں ہیں۔