سعودی شہری اپنے دوستوں کو عمرہ کیلئے ’پرسنل وزٹ ویزا‘ پر بلا سکتے
ریاض :سعودی عرب نے عمرہ کی سعادت حاصل کرنے والے غیر ملکیوں کیلئے نئی اسکیم کا اعلان کیا ہے۔سعودی عرب کی وزارت حج و عمرہ کی جانب سے سوشل میڈیا پر جاری بیان میں کہا گیا ہے کہ سعودی شہری اپنے دوستوں کو عمرہ کی سعادت کے لیے ’پرسنل وزٹ ویزا‘ پر مملکت سعودیہ بلوا سکتے ہیں۔سوشل میڈیا پر جاری بیان میں سعودی وزارت حج و عمرہ نے بتایا کہ پرسنل وزٹ ویزا پر آنے والے غیر ملکی شہری ایک مرتبہ یا اس سے زائد بار انٹری ویزا کی سہولت حاصل کر سکیں گے۔سعودی وزارت حج و عمرہ کی جانب سے یہ بھی بتایا گیا ہے کہ اس ویزا پر آنے والے غیر ملکی عمرہ کی سعادت کے علاوہ مسجد نبوی ؐ کی زیارت بھی کر سکیں گے، اس کے علاوہ مختلف شہروں میں تاریخی مقامات اور ثقافتی مراکز کا دورہ بھی کر سکیں گے۔سعودی وزارت کا کہنا ہے پرسنل وزٹ ویزا پر آنے والے غیر ملکیوں کو سعودی عرب کے تمام شہروں اور ریجنز کو دیکھنے کی بھی اجازت ہو گی۔
