خانگی بینک کے دو ملازمین برسرموقع ہلاک
حیدرآباد۔ 3 جنوری (سیاست نیوز) لنگر حوض میں پیش آئے ایک المناک سڑک حادثہ میں ٹپر لاری کی ٹکر سے خانگی بینک کے دو ملازمین ہلاک ہوگئے ہیں۔ تفصیلات کے بموجب 25 سالہ سید شہباز احمد ساکن انصاری روڈ کاروان اور 28 سالہ دیپیکا نکم ساکن موسیٰ باؤلی آج صبح 7 بجے پلر نمبر 102 کے پاس یو ٹرن لے رہے تھے کہ تیز رفتار ٹپر لاری نے انہیں ٹکر دے دی۔ اس حادثہ میں دونوں برسرموقع ہلاک ہوگئے۔ جس کے نتیجہ میں لنگر حوض مین روڈ پر دیر تک ٹریفک آمدورفت متاثر رہی ۔ انسپکٹر لنگر حوض سی ایچ سرینواس نے بتایا کہ سید شہباز احمد اور دیپیکا نکم آئی سی آئی سی آئی بینک میں ٹیلی کالرس تھے اور آج دونوں ایکٹیوا موٹر سائیکل پر ڈیوٹی جارہے تھے کہ حادثہ پیش آیا۔ انسپکٹر نے کہا کہ ڈرائیور لاپرواہی سے لاری چلا رہا تھا جبکہ یہ دونوں یو ٹرن لیتے وقت حادثہ کا شکار ہوگئے۔ پولیس نے نعشوں کو دواخانہ عثمانیہ بغرض پوسٹ مارٹم منتقل کیا اور ٹپر ڈرائیور کے خلاف تعزیرات ہند کی دفعہ 304(A) کے تحت ایک مقدمہ درج کرلیا ہے۔ پولیس اس حادثہ سے متعلق مزید تحقیقات کیلئے مقامی سی سی ٹی وی کیمروں کی ریکارڈنگ حاصل کرنے میں مصروف ہے۔