رام مندر چوری معاملہ
نئی دہلی، 12 جولائی (یواین آئی) کانگریس نے رام مندر چڑھاوا چوری کے معاملے میں بھارتیہ جنتا پارٹی اور راشٹریہ سویم سیوک سنگھ (بی جے پی۔آر ایس ایس) پر حملہ بولتے ہوئے کہا ہے کہ عقیدت کے ساتھ کی گئی اس دھوکہ دہی کو ملک کبھی معاف نہیں کرے گا۔کانگریس کے کمیونیکیشن ڈپارٹمنٹ کے انچارج جے رام رمیش نے اتوار کو سوشل میڈیا پلیٹ فارم ‘ایکس’ پر کہا کہ بھگوان شری رام مندر کے چڑھاوا چوری کے معاملے کا انکشاف ہوئے ایک مہینہ گزر چکا ہے ، لیکن وزیر اعظم نریندر مودی اس معاملے پر جوابدہی کے نام پر بالکل خاموش ہیں۔ انہوں نے الزام لگایا کہ اس معاملے میں روزانہ لاکھوں روپے غائب ہونے کی بات کو خصوصی تحقیقاتی ٹیم (ایس آئی ٹی) بھی تسلیم کرنے پر مجبور ہے ، اور یہ معاملہ صرف چند ملازمین تک محدود نہیں ہو سکتا۔انہوں نے کہا کہ کانگریس شروع سے ہی کہہ رہی ہے کہ ایس آئی ٹی کی تشکیل، ایف آئی آر اور استعفے محض لوگوں کی آنکھوں میں دھول جھونکنے کی کوششیں ہیں۔ ان کا الزام تھا کہ حکومت اصل قصورواروں کو بچانے میں لگی ہوئی ہے اور معاملے کو دبانے کی کوشش کر رہی ہے ۔ کانگریس نے اس معاملے میں سپریم کورٹ کی نگرانی میں آزادانہ اور منصفانہ جانچ، فارنسک آڈٹ، جوابدہی طے کرنے اور قصورواروں کے خلاف سخت کارروائی کے مطالبے کو دہرایا۔ پارٹی نے کہا کہ وزیر اعظم کو اس معاملے میں اپنی خاموشی توڑنی چاہیے اور ملک کو جواب دینا چاہیے ۔