نئی دہلی: فی الحال ہندوستان میں ڈیجیٹل انقلاب کے رکنے کے کوئی آثار نہیں ہیں۔ گرچہ’ آٹا‘ (اشیاء خورد نوش )کیلئے انہیں سیاسی پارٹیوں کا مہرہ کیوں نہ بننا پڑے، لیکن’ ڈاٹا‘(انٹر نیٹ کی فراہمی) کے لیے وہ دیوانے نظر آ رہے ہیں۔ جی ہاں! ملک میں انٹرنیٹ استعمال کرنے والوں کی تعداد میں مسلسل اضافہ ہو رہا ہے اور اس سے ظاہر ہوتا ہے کہ ملک میں ڈیجیٹل میڈیم کو کئی مقاصد کے لیے استعمال کیا جا رہا ہے۔ٹیلی کام ریگولیٹری اتھارٹی آف انڈیا کی تازہ ترین ٹیلی کام سبسکرائبر رپورٹ نے انکشاف کیا ہے کہ ملک میں انٹرنیٹ استعمال کرنے والوں کی تعداد میں تیزی سے اضافہ ہوا ہے۔
ٹیلی کام ریگولیٹری اتھارٹی آف انڈیا کی تازہ ترین رپورٹ کے مطابق، دسمبر 2023 کے آخر میں، ہندوستان میں 936.16 ملین صارفین انٹرنیٹ استعمال کر رہے تھے۔ صرف تین ماہ میں انٹرنیٹ استعمال کرنے والوں کی تعداد میں تقریباً 2 فیصد اضافہ ہوا ہے۔موبائل براڈ بینڈ کے ذریعے وائرلیس انٹرنیٹ استعمال کرنے والوں کی تعداد تقریباً 897.59 ملین ہے۔ لیکن وائرڈ براڈ بینڈ استعمال کرنے والوں کی تعداد بھی بڑھ رہی ہے اور 38.57 ملین کنکشن ہیں۔سب سے زیادہ اضافہ براڈ بینڈ صارفین کی تعداد میں ہوا ہے۔ براڈ بینڈ انٹرنیٹ استعمال کرنے والوں کی کل تعداد 904.54 ملین رہی جو کہ گزشتہ سہ ماہی کے مقابلے میں 2 فیصد زیادہ ہے۔ پرانی ٹیکنالوجی پر چلنے والے تنگ بینڈ کنکشنز میں 31.6 ملین کی کمی واقع ہوئی ہے کیونکہ زیادہ تر ہندوستانی اب تیز رفتار ڈیٹا پلان چاہتے ہیں۔
