کولکاتا، 12 جون (یو این آئی) مغربی بنگال کی سابق وزیر اعلیٰ اور ترنمول کانگریس (ٹی ایم سی) کی سربراہ ممتا بنرجی کے خلاف رواں سال کے اوائل میں ایک سیاسی جلسے کے دوران مبینہ طور پر اشتعال انگیز بیان دینے کے الزام میں جمعہ کو ایک معاملہ درج کیا گیا۔ پولیس ذرائع کے مطابق، ایک تاجر کی جانب سے 7 جون کو ہیئر اسٹریٹ پولیس تھانے میں درج کرائی گئی شکایت کی بنیاد پر معاملہ درج کرکے تحقیقات شروع کر دی گئی ہیں۔ شکایت کنندہ کا الزام ہے کہ اسمبلی انتخابات سے قبل وسطی کولکاتہ کے رانی راس منی ایونیو میں منعقدہ ایک عوامی جلسے کے دوران ممتا بنرجی کی تقریر میں کی گئی بعض باتیں اشتعال انگیز تھیں اور سماجی ہم آہنگی کو متاثر کرنے کی صلاحیت رکھتی تھیں۔ اس وقت بھی ان کے اس بیان پر سیاسی حلقوں میں شدید تنازعہ پیدا ہوا تھا اور اپوزیشن جماعتوں نے الزام لگایا تھا کہ ٹی ایم سی سربراہ نے ایسے بیانات دیے جنہیں تقسیم پیدا کرنے والا اور اشتعال انگیزسمجھا جا سکتا ہے ۔ یہ تقریر سوشل میڈیا پر بھی بڑے پیمانے پر وائرل ہوئی تھی، جس کے بعد مختلف حلقوں کی جانب سے ناراضی کا اظہار کیا گیا تھا۔ ناقدین نے سوال اٹھایا تھا کہ آیا ریاست کے اعلیٰ ترین انتظامی عہدے پر فائز کسی رہنما کو ایسے بیانات دینا چاہیے جنہیں مختلف برادریوں کے درمیان کشیدگی پیدا کرنے کے طور پر دیکھا جا سکتا ہو۔ اب ایک تاجر کی جانب سے قانونی کارروائی کا مطالبہ کیے جانے کے بعد یہ تنازع دوبارہ موضوعِ بحث بن گیا ہے ۔ بھارتیہ نیائے سنہتہ (بی این ایس) کی دفعات 196(1)، 351(2) اور 352 کے تحت معاملہ درج کیا گیا ہے ۔ تفتیشی حکام تقریر اور ان حالات کا جائزہ لے رہے ہیں جن میں یہ بیانات دیے گئے تھے ۔ اس سے قبل اسی ماہ ممتا بنرجی کے خلاف انتخابی عمل کے دوران تعینات الیکشن کمیشن اور مرکزی مسلح پولیس فورسز سمیت آئینی اداروں کے بارے میں مبینہ طور پر قابلِ اعتراض ریمارکس دینے پر بھی شکایات درج کرائی گئی تھیں۔ 4 جون کو درج شکایت میں الزام عائد کیا گیا تھا کہ ممتا بنرجی نے ان اداروں کی غیر جانبداری اور دیانت داری پر سوالات اٹھائے تھے ۔ شکایت کنندہ نے 2 جون کو وسطی کولکاتا میں ان کی ایک اور مبینہ تقریر کا بھی حوالہ دیا، جس میں انہوں نے مرکزی وزارتِ داخلہ کے ساتھ خفیہ بات چیت کا ذکر کیا تھا اور مرکزی حکومت و مرکزی وزیر داخلہ کو بنگلہ دیش میں پیش آئے سیاسی قتل کے معاملے سے جوڑنے والے الزامات عائد کیے تھے ۔ اس کے علاوہ، ایک ہفتہ قبل وکیل رنکو چٹرجی سنگھ نے بھی سلی گوڑی سائبر پولیس میں ممتا بنرجی کے خلاف ایک تحریری شکایت درج کرائی تھی، جس میں ان پر مذہبی جذبات کو مجروح کرنے کا الزام لگایا گیا تھا۔
