کولہاپور: مہاراشٹر کے سابق رکن پارلیمنٹ راجو شیٹی کی قیادت میں سوابھیمانی شیتکاری سنگٹھن(ایس ایس ایس) نے اپنے مطالبات پر منگل کے روز ’آکروش پدیاترا‘ نکالی۔ شیٹی کی قیادت میں ایس ایس ایس کے سینکڑوں کارکنان اور کسان دتہ شوگر فیکٹری کے سامنے جمع ہوئے اور گزشتہ سال کے کرشنگ سیزن کیلئے گنے کی دوسری قسط 400 روپے فی ٹن کے مطالبات پر نعرے لگاتے ہوئے اپنی ’اکروش پدیاترا‘ شروع کی۔ یہ پد یاترا دتہ کوآپریٹیو شوگر فیکٹری سے شرول میں شروع ہوئی۔ ایس ایس ایس کے کارکنوں نے گنے کی دوسری قسط کے طور پر فی ٹن 400 روپے اور گنے کے ڈیجیٹل بیلنس کے بغیر اس سال کرشنگ سیزن کی اجازت نہ دینے کا مطالبہ کیا ہے ۔ ایس ایس ایس پچھلے مہینے سے گنے کیلئے فی ٹن 400 روپے کی دوسری قسط کا مطالبہ کر رہا تھا اور اس معاملے پر ‘عوامی بیداری مہم’ بھی چل رہی ہے ، جب کہ شیٹی اور ضلع کلکٹر راہل ریکھاور کے درمیان حال ہی میں ضلع میں کشیدگی پیدا ہوگئی تھی۔ کلکٹریٹ آفس میں ایک میٹنگ بھی ہوئی جو ناکام رہی اور اسی بنیاد پر شیٹی نے انتباہ دیا کہ وہ احتجاج کو مزید تیز کریں گے ۔ کل 37 شوگر ملوں کا احاطہ کیا جائے گا جن میں گرودت، جواہر، گھور پڑے ، شاہو، ورنا، کرانتی، وسنت دادا، راجہ رام بالو اور دیگر شامل ہیں اور کل 22 دن اور 533 کلومیٹر کا فاصلہ طے کیا جائے گا اور 7 نومبر کو جے سنگھ پور میں اس کا اختتام ہوگا۔
