چینائی: تمل ناڈو کے وزیر اعلی ایم کے اسٹالن نے کہا ہے کہ وہ قومی تعلیمی پالیسی (این ای پی) کے نفاذ اور ایس ایس اسکیم کے تحت فنڈ جاری کرانے اور چنئی میٹرو ریل پروجیکٹ فیز II کے واسطے فنڈ کی درخواست کرنے کے لیے وزیر اعظم نریندر مودی سے ملاقات کریں گے ۔مرکز کے اس دعوے کے بارے میں کہ ریاست کو صرف اسی صورت میں فنڈ ملے گا جب وہ این ای پی کو نافذ کرے گی، مسٹر اسٹالن نے نامہ نگاروں کو بتایا کہ وزراء اور ریاستی حکام نے پہلے ہی مرکز کے ساتھ اس معاملے پر بات چیت کی ہے ۔مسٹر اسٹالن پہلے ہی اس سلسلے میں وزیر اعظم کو ایک خط لکھ چکے ہیں اور ان پر زور دیا ہے کہ وہ فنڈز کے اجراء کو NEP کے نفاذ سے منسلک نہ کریں۔واضح رہے کہ مسٹر اسٹالن نے 27 اگست کو امریکہ روانہ ہونے سے پہلے وزیر اعظم کو لکھے گئے اپنے خط میں کہا تھا کہ سرو شکشا (ایس ایس) اسکیم کے تحت گرانٹس روکنے کے مرکز کے اقدام سے لاکھوں بچوں کی تعلیم پر شدید اثر پڑ رہا ہے ۔ پسماندہ طبقوں اور ٹیچر کمیونٹی پر اس کا منفی اثر پڑے گا۔
