شیلانگ: میگھالیہ کے وزیر اعلیٰ کونراڈ سنگما نے کہا ہے کہ ان کی حکومت کا ریاست میں یکساں سیول کوڈ (یو سی سی) کو نافذ کرنے کا کوئی منصوبہ نہیں ہے۔ مسٹر سنگما نے جمعرات کی شام یہاں نامہ نگاروں کو بتایا کہ ریاستی حکومت کے طور پر، یہ بالکل واضح ہے کہ یکساں سیول کوڈ (یو سی سی) ہمارے ایجنڈے میں نہیں ہے ۔ہم اپنی قبائلی برادریوں کی متنوع شناختوں کا احترام کرتے ہیں اور ہمیں ان کے روایتی طریقوں کی حفاظت کرنی چاہیے ۔ انہوں نے کہا کہ ملک کی متنوع ثقافتی اور قبائلی برادریوں کو دیکھتے ہوئے یو سی سی کا نفاذ نہ تو عملی ہے اور نہ ہی مناسب۔ یوسی سی، یہ یقینی بنانے کے تصور کے طور پرکہ سب کچھ یکساں ہوجائے ، ہندوستان میں ناممکن ہے ۔ وزیراعلیٰ نے کہا کہ کچھ قبائلی اور مقامی کمیونٹیز ہیں جن کی خصوصی رسمیں ہیں، جو برابری کے مطابق نہیں ہوسکتیں۔ زندگی کے ہر پہلو میں تمام برادریوں پر مساوات کا قانون نافذ کرنا درست نہیں ہوگا۔ اگر قومی یا ریاستی سطح پر کوئی بل یہ اعلان کرتا ہے کہ پورے ملک کو مادری نظام کو اپنانا چاہیے ، تو میگھالیہ اس کی حمایت کرے گا، کیونکہ ہم ایک مادری سماج ہیں۔
