کولکاتہ :مغربی بنگال کی وزیر اعلیٰ ممتا بنرجی نے جمعہ کو 2,000 کے کرنسی نوٹوں کو گردش سے نکالنے کے فیصلے پر مرکز کو تنقید کانشانہ بنایا اور اسے ’بلین ڈالر کا دھوکہ‘ قرار دیا۔ ان کا یہ تبصرہ ریزرو بینک آف انڈیا کی جانب سے 2,000 مالیت کے کرنسی نوٹوں کو گردش سے واپس لینے کے اعلان کے چند گھنٹے بعد آیا ہے۔ ممتا بنرجی نے 2016 میں نوٹ بندی کی وجہ سے لوگوں کی ’مصیبتوں‘ کو یاد کیا جسے بھلایا نہیں جا سکتا۔انہوں نے ایک ٹویٹ میں کہا کہ یہ تو 2000 کا دھمکا نہیں ہے بلکہ ایک ارب ہندوستانیوں کے ساتھ ایک بلین ڈالر کا دھوکہ ہے۔ میرے پیارے بھائیو اور بہنو جاگو! ہم نے نوٹ بندی کی وجہ سے جو تکالیف برداشت کی ہیں اسے فراموش نہیں کیا جا سکتا اور جنہوں نے اس تکلیف کو پہنچایا ان کو اس کا سامنا کرنا چاہئے۔ معاف نہیں کیا جائے گا!کل آر بی آئی نے اپنے نوٹیفکیشن میں تمام بینکوں کو ہدایت دی کہ وہ کلیئر نوٹ پالیسی کے مطابق فوری طور پر 2,000 کے نوٹ جاری کرنے سے روک دیں۔ تاہم اس نے کہا کہ شہری 30 ستمبر 2023 تک کسی بھی بینک برانچ میں کرنسی نوٹ جمع کروا سکتے ہیں۔آر بی آئی کے مطابق 2,000 کے نوٹ متعارف کرانے کا مقصد ایک بار پورا ہو گیا جب دیگر مالیت کے بینک نوٹ مناسب مقدار میں دستیاب ہو گئے۔
