سرینگر: وادی کشمیر میں سخت ترین سردیوں کے لئے مشہور چلہ کلان اور چلہ خورد کا دور اقتدار ختم ہونے کے باوجود بھی شبانہ سردیوں کا زور برابر جاری ہے ۔ ادھر محکمہ موسمیات کے ایک ترجمان کے مطابق وادی میں اگلے چوبیس گھنٹوں کے دوران کہیں کہیں ہلکے درجے کی برف باری یا بارش کا امکان ہے ۔ انہوں نے کہا کہ وادی میں دو اور تین مارچ کو بالائی علاقوں میں کہیں کہیں ہلکی برف باری اور میدانی علاقوں میں ہلکی بارش متوقع ہیں۔ ان کا کہنا تھا کہ تاہم 5 مارچ تک کسی بھاری برف باری کا کوئی امکان نہیں ہے ۔ وادی میں ابر آلود موسم کے بیچ شبانہ درجہ حرارت مسلسل نقطہ انجماد سے نیچے درج ہو رہا ہے ۔ گرمائی دارلحکومت سری نگر میں کم سے کم درجہ حرارت منفی 3.4 ڈگری سینٹی گریڈ ریکارڈ کیا گیا جہاں گذشتہ شب کا کم سے کم درجہ حرارت منفی0.6 ڈگری سینٹی گریڈ ریکارڈ ہوا تھا۔
