لاتور،18مئی (ایجنسیز) قومی اہلیت و داخلہ ٹسٹ (نیٹ یو جی) کے مبینہ پرچہ افشاء معاملے کی تحقیقات کرنے والی مرکزی تفتیشی ایجنسی سی بی آئی نے مہاراشٹر کے شہر لاتور میں واقع رینوکائی کیمسٹری کلاسز کے مرکزی دفتر پر تلاشی کارروائی انجام دی۔ ذرائع کے مطابق سی بی آئی حکام نے دوپہر کے وقت شیون نگر علاقے میں واقع ادارے میں تلاشی شروع کی جو رات دیر تک جاری رہی۔ اطلاعات کے مطابق سی بی آئی نے رینوکائی کیمسٹری کلاسز کے بانی شیوراج موٹے گاؤںکر سے ان کی رہائش گاہ پر تقریباً آٹھ گھنٹے تک پوچھ گچھ کی تھی۔ ذرائع نے کہا ہے کہ سی بی آئی کو شبہ ہے کہ لاتور کے بعض ڈاکٹروں نے مبینہ طور پر افشاء شدہ نیٹ امتحانی پرچہ خریدا تھا۔ وفاقی تحقیقاتی ایجنسی نے اس معاملے میں ایف آئی آر درج کرتے ہوئے خصوصی ٹیمیں تشکیل دی ہیں تاکہ مبینہ پرچہ معاملہ کی مکمل جانچ کی جا سکے۔ اسی تنازعہ کے باعث 3 مئی کو منعقدہ نیٹ امتحان منسوخ کردیا گیا تھا۔ نیشنل ایلیجیبلیٹی کم انٹرنس ٹسٹ (نیٹ) ملک کے 551 شہروں اور بیرون ملک 14 مراکز پر منعقد کیا گیا تھا۔ قومی ٹیسٹنگ ایجنسی (این ٹی اے) کے مطابق تقریباً 23 لاکھ امیدواروں نے اس امتحان کے لیے رجسٹریشن کرایا تھا۔ این
ٹی اے کا کہنا ہے کہ امتحان میں مبینہ بے ضابطگیوں سے متعلق معلومات امتحان کی شام موصول ہوئی تھیں۔
