ممبئی: ممبئی میں گیلین بیری سنڈروم (جی بی ایس) سے پہلی ہلاکت ہوئی ہے ، مہاراشٹرا میں اس بیماری سے ہونے والی اموات کی مجموعی تعداد اب آٹھ تک پہنچ گئی ہے ۔گیلین بیری سنڈروم سے ہلاک ہونے والا وڈالہ کا 53 سالہ شخص تھا، جو برہان ممبئی میونسپل کارپوریشن (بی ایم سی) کے بی این ڈیسائی اسپتال میں وارڈ بوائے کے طور پر خدمات انجام دے رہا تھا۔ انہیں نائر اسپتال میں داخل کرایا گیا، جہاں وینٹی لیٹر پر رکھنے کے باوجود وہ جانبر نہ ہو سکے اور بیماری کے باعث دم توڑ گئے ۔ممبئی میں پہلے جی بی ایس کیس کی تصدیق کے چند دن بعد یہ ہلاکت ہوئی ہے ، جب 64 سالہ خاتون میں اس سنڈروم کی تشخیص ہوئی تھی۔
متاثرہ خاتون اسہال اور بخار کی شکایت کے بعد چڑھتے ہوئے فالج کا شکار ہو گئی تھیں، جو اس بیماری کی ایک خاص علامت ہے ۔اطلاعات کے مطابق، صرف پونے میں جی بی ایس کے مشتبہ اور تصدیق شدہ کیسز کی تعداد 197 تک پہنچ گئی ہے ۔ حال ہی میں مزید پانچ مریضوں میں اس نایاب اعصابی عارضے کی تشخیص ہوئی ہے ، جبکہ ریاست میں اموات کی مجموعی تعداد آٹھ ہو چکی ہے ۔دریں اثنا، پونے میونسپل کارپوریشن نے گیلین بیری سنڈروم کے پھیلاؤ کے خلاف فوری اقدامات کیے ہیں۔ حکام نے ناندیڑ گاؤں، دھااری اور سنگھ گڑھ روڈ کے قریبی علاقوں میں واقع 30 نجی واٹر سپلائی پلانٹس کو سیل کر دیا ہے ۔ ان علاقوں کو وبا کے ممکنہ مرکز کے طور پر شناخت کیا گیا تھا۔ پلانٹس کو اس وقت بند کیا گیا جب ان سے لیے گئے پانی کے نمونے انسانی استعمال کیلئے غیر موزوں پائے گئے
