نشین،18ستمبر (آئی اے این ایس) ہندوستانی خواتین کرکٹ ٹیم اتوار کو آیچی-ناگویا ایشین گیمز 2026 کے دوسرے سیمی فائنل میں بنگلہ دیش کے خلاف میدان میں اترے گی۔ مقابلہ کوروگی اسپورٹس پارک میں کھیلا جائے گا۔ ہندوستانی ٹیم 2023 کے ہانگ ڑو ایشین گیمز میں جیتے گئیگولڈ میڈل کا دفاع کرنے کے عزم کے ساتھ میدان میں اترے گی۔ہرمن پریت کور کی قیادت میں ہندوستانی خواتین ٹیم نے کوارٹر فائنل میں میزبان جاپان کو یکطرفہ مقابلے میں شکست دے کر سیمی فائنل میں جگہ بنائی۔ ہندوستان نے مسلسل دوسری مرتبہ ایشین گیمز میں سیمی فائنل کے لیے کوالیفائی کیا ہے۔ہندوستانی ٹیم 2023 کے ایشین گیمز میں سری لنکا کو فائنل میں شکست دے کرگولڈ میڈلجیت چکی ہے اور اس مرتبہ بھی صورتحال گزشتہ ایڈیشن سے کافی حد تک ملتی جلتی ہے۔ 2023 کی طرح اس بار بھی ہندوستان کا سامنا سیمی فائنل میں بنگلہ دیش سے ہوگا، جبکہ دوسرے سیمی فائنل میں سری لنکا اور پاکستان آمنے سامنے ہوں گے۔ہندوستانی خواتین ٹیم چند روز قبل آٹھویں ایشیا کپ کا خطاب جیتنے کے بعد بھرپور اعتماد کے ساتھ میدان میں اترے گی۔ ایشیا کپ کے سیمی فائنل میں بھی بنگلہ دیش کو ہندوستان کے خلاف شکست کا سامنا کرنا پڑا تھا۔سیمی فائنل سے قبل ہندوستانی کھلاڑی عمدہ فارم میں ہیں۔ بیٹنگ میں شفالی ورما اور اسمرتی مندھانا نمایاں کارکردگی کا مظاہرہ کررہی ہیں، جبکہ بولنگ کا شعبہ بھی بیٹرس کی کارکردگی کا بھرپور ساتھ دے رہا ہے۔سری چرانّی شاندار فارم میں ہیں اور مسلسل دو مرتبہ چار وکٹ حاصل کرچکی ہیں۔ ان کی دوسری چار وکٹوں کی کارکردگی جاپان کے خلاف کوارٹر فائنل میں سامنے آئی۔ وہ اس وقت دنیا کی نمبر ایک ٹی ٹوئنٹی بین الاقوامی بولر ہیں۔دیپتی شرما بیٹنگ اوربولنگ دونوں شعبوں میں مسلسل اپنی اہمیت ثابت کررہی ہیں، جبکہ فاسٹ بولر نندنی شرما نے بھی متاثر کن کارکردگی پیش کی ہے۔ہندوستانی ٹیم کو لیگ اسپنر شری یانکا پاٹل کی واپسی سے بھی تقویت ملی ہے۔ انجری کے باعث طویل عرصے تک ٹیم سے باہر رہنے کے بعد واپسی کرنے والی شری یانکا نے جاپان کے خلاف کوارٹر فائنل میں ایک وکٹ حاصل کی تھی۔ہندوستانی ٹیم کو اپنی مڈل آرڈر بیٹنگ سے مزید بہتر کارکردگی کی امید ہوگی۔ حالیہ مقابلوں میں ٹاپ آرڈر کی جانب سے زیادہ ذمہ داری نبھائے جانے کے باعث مڈل آرڈر کو زیادہ آزمانے کا موقع نہیں ملا ہے۔دوسری جانب بنگلہ دیش سیمی فائنل میں نشین میں بغیر کسی میچ کے پہنچا ہے۔ اس کا چین کے خلاف کوارٹر فائنل بارش کے باعث منسوخ ہوگیا تھا اور بہتر درجہ بندی کی وجہ سے بنگلہ دیش کو سیمی فائنل میں جگہ مل گئی۔رپورٹس کے مطابق نگار سلطانہ جلد ٹی ٹوئنٹی بین الاقوامی ٹیم کی کپتانی سے دستبردار ہونے والی ہیں اور وہ سیمی فائنل میں ہندوستان کے خلاف ایک بڑی کامیابی حاصل کرنے کے لیے پرعزم ہوں گی۔ تاہم بنگلہ دیشی ٹیم کو معلوم ہے کہ اس کا مقابلہ ایک انتہائی مضبوط ہندوستانی ٹیم سے ہے۔ دونوں ٹیموں کے درمیان اب تک ہندوستان کا پلڑا بھاری رہا۔
