گوہاٹی، 9 اپریل (پی ٹی آئی)آئی پی ایل 2026 میں جمعہ کو گوہاٹی کے میدان پر راجستھان رائلز اور رائل چیلنجرز بنگلورو کے درمیان ایک سنسنی خیز مقابلے کی توقع کی جا رہی ہے، جہاں دونوں ٹیموں کے مضبوط ٹاپ آرڈر بیٹرس میچ کا رخ متعین کرنے میں کلیدی کردار ادا کریں گے۔ راجستھان رائلز کی بیٹنگ لائن اپ اس سیزن میں عمدہ فارم میں دکھائی دے رہی ہے، خاص طور پر اوپنرز یشسوی جیسوال اور ویبھَو سوریا ونشی نے ٹیم کو جارحانہ شروعات فراہم کی ہیں۔ جیسوال اپنی شاندار اسٹروک پلے اور تیز رفتار اسکورنگ کی بدولت حریف ٹیموں کے لیے مسلسل خطرہ بنے ہوئے ہیں، جبکہ نوجوان سوریا ونشی نے بھی اعتماد کے ساتھ کھیلتے ہوئے ٹیم کو مضبوط بنیاد فراہم کی ہے۔ دوسری جانب رائل چیلنجرز بنگلورو کی قیادت تجربہ کار اسٹار ویرات کوہلی کر رہے ہیں، جو اپنی مستقل مزاجی اور کلاسک بیٹنگ اسٹائل کے لیے جانے جاتے ہیں۔ اگرچہ وہ ٹی20 انٹرنیشنل کرکٹ سے کنارہ کش ہو چکے ہیں، لیکن آئی پی ایل میں ان کی کارکردگی اب بھی غیر معمولی ہے اور وہ ٹیم کے لیے سب سے بڑا ستون سمجھے جاتے ہیں۔ آر سی بی کے لیے وکٹ کیپر بیٹر فل سالٹ نے بھی حالیہ میچوں میں جارحانہ انداز اپناتے ہوئے تیز رنز بنائے ہیں، جبکہ نمبر تین پرکھیلنے والے دیودت پڈیکل نے ایک بار پھر اپنی فارم حاصل کر لی ہے۔ پڈیکل جنہوں نے اپنے ابتدائی آئی پی ایل سیزن میں شاندار کارکردگی دکھائی تھی، اب دوبارہ اپنی پرانی تال میں نظر آرہے ہیں اور ٹیم کے مڈل آرڈر کو استحکام فراہم کر رہے ہیں۔ یہ میچ بنیادی طور پر دونوں ٹیموں کے ٹاپ آرڈرکے درمیان مقابلہ ہوگا، جہاں ایک طرف راجستھان کے جارحانہ مزاج اوپنرز ہوں گے تو دوسری طرف بنگلورو کے تجربہ کار اور تکنیکی طور پر مضبوط بیٹرس میدان میں اتریں گے۔ ماہرین کے مطابق جو ٹیم ابتدائی اوورز میں بہتر کارکردگی دکھائے گی، اس کے جیتنے کے امکانات زیادہ ہوں گے۔ پچ اورکنڈیشنز بھی بیٹنگ کے لیے سازگار سمجھی جا رہی ہیں، جس کے باعث ایک ہائی اسکورنگ میچ کی توقع ہے۔ ایسے میں بولرز کے لیے چیلنج ہوگا کہ وہ رنزکے بہاؤ کو قابو میں رکھیں اور اہم مواقع پر وکٹیں حاصل کریں۔ دونوں ٹیمیں پوائنٹس ٹیبل پر اپنا موقف مضبوط کرنے کے لیے یہ میچ جیتنے کی خواہاں ہیں، جس کی وجہ سے شائقین کرکٹ کو ایک دلچسپ اور سنسنی خیز مقابلہ دیکھنے کو مل سکتا ہے۔بنگلور کیلئے پھر ایک مرتبہ ویراٹ کوہلی توجہ کا مرکز ہوں گے جو اپنے شاندار کرئیر کے آخری برسوں میں پہنچ چکے ہیں جبکہ حریف ٹیم میں سوریا توجہ کا مرکز ہوں گے جو تیزی سے نئے سوپر اسٹار بننے کی سمت گامزن ہیں۔ E/K
