چنڈی گڑھ: ہریانہ کے سابق وزیر اعلی بھوپیندر سنگھ ہڈا نے آج کہا کہ ریاست میں حالیہ ژالہ باری سے کسانوں کی فصلوں کو بہت زیادہ نقصان پہنچا ہے لیکن حکومت اس کے لیے کسانوں کو معاوضہ نہیں دے رہی ہے ۔بھوپیندر سنکھ ہڈا نے کہا کہ اب تک ریاست کی تقریباً 60 فیصد فصلوں کا سروے نہیں ہوا ہے ۔ ریاست میں 89.85 لاکھ ایکڑ اراضی کا اندراج ہونا تھا، جب کہ اب تک صرف 36.28 لاکھ ایکڑ اراضی کا اندراج ہوا ہے ۔ رجسٹریشن کے بغیر، بھارتیہ جنتا پارٹی (بی جے پی) حکومت نہ تو کسانوں کو معاوضہ دیتی ہے اور نہ ہی فصل خریدتی ہے ۔انہوں نے کہا کہ حکومت خصوصی سروے اور دیگر تمام کارروائیوں کو جلد از جلد مکمل کرے اور کسانوں کو مناسب معاوضہ دیا جائے کیونکہ سرسوں، گندم اور سبزیوں کی فصلوں کو تقریباً 10 اضلاع میں خطیر نقصان پہنچا ہے ۔ انہوں نے گندم کے کاشتکاروں کو بونس دینے کا مطالبہ بھی کیا ہے ۔ انہوں نے کہا کہ راجستھان حکومت نے گیہوں پر 125 روپے فی کوئنٹل بونس دینے کا اعلان کیا ہے ۔ ہریانہ کے کسانوں کو بھی اس طرح کا فائدہ ملنا چاہیے ۔بھوپیندر سنگھ ہڈا نے کہا کہ جب سے بی جے پی اقتدار میں آئی ہے ، کسانوں کو نہ تو کم از کم امدادی قیمت (ایم ایس پی) مل رہی ہے اور نہ ہی بونس ملا ہے ۔ جبکہ ریاستی حکومت بار بار 24 فصلوں پر ایم ایس پی دینے کی بات کر رہی ہے ۔
