بھوپال: مدھیہ پردیش کے بیتول پارلیمانی حلقہ میں بہوجن سماج وادی پارٹی کے امیدوار کی موت کی وجہ سے اب ووٹنگ 26 اپریل کے بجائے 7 مئی کو ہوگی۔مدھیہ پردیش کے چیف الیکٹورل آفیسر انوپم راجن کی طرف سے دی گئی معلومات کے مطابق الیکشن کمیشن آف انڈیا نے بیتول لوک سبھا حلقہ نمبر-29 کے انتخابات کے لیے ایک نیا پروگرام جاری کیا ہے ۔ اب یہاں ووٹنگ 07 مئی 2024 کو ہوگی۔ اس پارلیمانی حلقہ پر بی ایس پی کی طرف سے اعلان کردہ با اختیار امیدوار 19 اپریل تک کاغذات نامزدگی داخل کر سکیں گے ۔ کاغذات نامزدگی کی جانچ پڑتال 20 اپریل کو ہوگی اور 22 اپریل پارٹی امیدواروں کے نام واپس لینے کی آخری تاریخ ہوگی۔ بیتول پارلیمانی حلقہ پر ووٹنگ 26 اپریل کو ہونی تھی لیکن کل اس پارلیمانی حلقہ سے بہوجن سماج وادی پارٹی کے امیدوار اشوک بھلاوی کی موت کی وجہ سے ووٹنگ ملتوی کر دی گئی۔
