امراوتی: جسٹس پرشانت کمار مشرا نے بدھ کے روز وجے واڑہ میں گورنر بسوا بھشن ہری چندن کے ذریعہ آندھرا پردیش ہائی کورٹ کے چیف جسٹس کے طور پر حلف لیا۔آندھرا پردیش میں اپنی تقرری سے قبل مشرا چھتیس گڑھ ہائی کورٹ کے قائم مقام چیف جسٹس کے طور پر کام کر رہے تھے۔29 اگست 1964 کو چھتیس گڑھ میں پیدا ہونے والے مشرا نے بی ایس سی اور ایل ایل بی بلاس پور کی گرو گھاسداس یونیورسٹی سے کی۔ انہوں نے رائے گڑھ کی ضلعی عدالت ، جبل پور میں مدھیہ پردیش ہائی کورٹ اور بلاس پور میں چھتیس گڑھ ہائی کورٹ میں قانون کی پریکٹس کی ہے۔2009 میں چھتیس گڑھ ہائی کورٹ کے جج کے طور پر اپنے عہدے پر فائز ہونے سے پہلے مشرا نے ریاست کے اضافی ایڈووکیٹ جنرل کی حیثیت سے کام کیا تھا۔حلف برداری تقریب میں آندھرا پردیش کے وزیر اعلیٰ جگن موہن ریڈی ، میونسپل ایڈمنسٹریشن کے وزیر بوٹسا ستی نارائن ، وزیر اوقاف ولیمپلی سرینواس ، چیف سکریٹری سمیر شرما اور ہائی کورٹ کے دیگر جج موجود تھے۔
