لاس اینجلس: جنوبی کیلیفورنیا میں سانتا اینا ہواؤں کی وجہ سے جنگل میں لگنے والی آگ نے شدت اختیار کر لی ہے جبکہ فائر فائٹرز نے چہارشنبہ کو بھی آگ پر قابو پانے کی کوششیں جاری رکھیں۔یو ایس نیشنل ویدر سروس نے کہا کہ گزشتہ روز ساحلی جنوبی کیلیفورنیا میں آگ کی شدید صورتحال جاری رہے گی لیکن ہفتے کے آخر تک اس میں بہتری آنے کی امید ہے اور چہارشنبہ کو مقامی وقت کے مطابق دوپہر 3 بجے تک ایک وارننگ جاری کی گئی۔لاس اینجلس کے علاقے میں بڑے پیمانے پر جنگل میں لگنے والی آگ سے کم از کم 25 افراد ہلاک اور 12,300 سے زائد عمارتیں تباہ ہو گئی ہیں۔ مقامی حکام نے تصدیق کی ہے کہ جنگل کی آگ کی وجہ سے کم از کم 26 افراد اب بھی لاپتہ ہیں۔ ان میں سے 20 کا تعلق ایٹن فائر ایریا سے اور چھ کا تعلق پالیسیڈس فائر ایریا سے ہے ۔کیلی فورنیا ڈیپارٹمنٹ آف فاریسٹری اینڈ فائر پروٹیکشن (کیل فائر) کے مطابق ایٹن اور پالیسیڈس میں جنگل کی آگ میں چہارشنبہ کی صبح تک بالترتیب صرف 45 فیصد اور 19 فیصد ہی قابو پایا گیا تھا۔گزشتہ ہفتے منگل کی شام کو لگی مہلک ایٹن آگ نے الٹاڈینا اور پاساڈینا کے قریب 14117 ایکڑ (57.1 مربع کلومیٹر) کو جھلسا دیا۔کیل فائر نے ایک رپورٹ میں کہا، “آج کی کوششیں پریمیٹر کنٹرول کویقینی بنانے کے لئے روک تھام لائنوں کو صاف کرنے اور مضبوط بنانے پر مرکوز ہیں۔ فائر فائٹرز اور عوام دونوں کی حفاظت کے لیے سڑکوں پر خطرناک درختوں کو کم کیا جارہا ہے ۔پالیسیڈس فائر لاس اینجلس کے علاقے میں سب سے بڑی فعال جنگل کی آگ ہے ، جس نے ایک ہفتے میں 23,713 ایکڑ (95.96 مربع کلومیٹر) کو جھلسا دیا۔کیل فائر نے کہا کہ سانتا انا کی ہوائیں کم ہونے کی توقع ہے لیکن علاقے میں نمی کم رہے گی اور ریڈ فلیگ وارننگ چہارشنبہ کی شام تک نافذ رہے گی۔جنوبی کیلی فورنیا کے زیادہ تر حصے کے لیے بنیادی برقی یوٹیلیٹی کمپنی، سدرن کیلیفورنیا ایڈیسن نے کہا کہ گزشتہ روز مقامی وقت کے مطابق صبح 7:20 بجے تک 81500 لوگ بجلی سے محروم رہے ۔
