پریاگ راج: اتر پردیش کی بندہ جیل میں قید مافیا ڈان مختار انصاری کو پیرکو گینگسٹر مقدمہ میں بڑی راحت ملی ہے۔ الہ آباد ہائی کورٹ نے اس معاملے میں مختار انصاری کی درخواست ضمانت منظورکرلی ہے۔ اس کے علاوہ عدالت کی جانب سے عائد 5 لاکھ روپے کے جرمانے پر بھی روک لگا دی گئی ہے۔ تاہم عدالت نے سزا پر روک نہیں لگائی۔ عدالت میں سزا پر سماعت جاری رہے گی۔ قابل ذکر ہے کہ مختار انصاری نے ہائی کورٹ میں درخواست داخل کرکے غازی پور کے ایم پی ۔ ایم ایل اے کی عدالت سے سنائی گئی 10 سال کی سزا کو چیلنج کیا تھا۔ غازی پور کے ایم پی ایم ایل اے کی خصوصی عدالت نے گینگسٹر مقدمہ میں مختار انصاری کو 29 اپریل کو سزا سنائی تھی۔ مختار انصاری کے وکیل اوپیندر اپادھیائے نے ہائی کورٹ میں عرضی داخل کی تھی۔ انہوں نے عدالت کو بتایا تھا کہ مختار انصاری ایک دہائی سے زیادہ عرصے سے جیل میں ہیں اور مقدمے کی سماعت کے دوران زیادہ سزائیں بھگت چکے ہیں۔ اس معاملے میں عدالت نے بندہ جیل سپرنٹنڈنٹ سے بھی رپورٹ طلب کی تھی۔ یہ رپورٹ بندہ جیل سپرنٹنڈنٹ نے عدالت میں جمع کروائی۔
