چندی گڑھ: پنجاب کانگریس کے صدر اور لدھیانہ کے ممبر پارلیمنٹ امریندر سنگھ راجہ وارنگ نے منگل کو پنجاب میں عام آدمی پارٹی کی حکومت پر سخت حملہ کرتے ہوئے الزام لگایا کہ اس نے ریاست کے چھ لاکھ سے زیادہ سرکاری ملازمین اور پنشنروں کو دھوکہ دیا ہے۔ وارنگ نے نشاندہی کی کہ عآپ حکومت 2021 سے زیر التواء واجبات کی ادائیگی میں ناکام رہی ہے ، جس سے خاندانوں کو مالی بحران کا سامنا ہے ۔ وارنگ نے کہا کہ یہ شرمناک ہے کہ عآپ حکومت کو ملازمین اور پنشنرز کیلئے اپنی ذمہ داری قبول کرنے کیلئے ہائی کورٹ کے حکم کی ضرورت تھی۔ انہوں نے کہا کہ عدالت میں ان کا حلف نامہ 2029-30 تک تقریباً 14,000 کروڑ روپے کے واجبات ادا کرنے کا وعدہ کرنا ایک ظالمانہ مذاق سے کم نہیں ہے ۔ انہوں نے کہا کہ اے اے پی حکومت 2030 تک اقتدار میں نہیں رہے گی، جس سے ظاہر ہوتا ہے کہ وہ اپنی ذمہ داری سے کس طرح بھاگ رہی ہے ۔ پی پی سی سی کے سربراہ نے ہماچل پردیش کی مثال دیتے ہوئے ملازمین اور پنشنرز کی فلاح و بہبود کے تئیں کانگریس پارٹی کے عزم کا موازنہ کیا۔
