گوہاٹی، 30 مئی (یو این آئی) آسام کے گوہاٹی میں جمعرات سے ہونے والی مسلسل بارش کی وجہ سے پورا شہر زیرآب آگیا ہے ۔شہر کی اہم سڑکوں میں سے ایک گوہاٹی-شیلانگ (جی ایس) روڈ کے زیادہ تر حصے زیرآب رہے ، جس کی وجہ سے شہر کے مختلف حصوں میں ٹریفک جام ہوگیا۔ جمعہ کو چاندماری، رکمنیگاؤں، ہاٹیگاؤں اور شہر کے کئی دوسرے حصوں میں اچانک سیلاب آگیا۔محکمہ موسمیات (آئی ایم ڈی) نے اگلے دو سے تین دنوں تک گوہاٹی اور ریاست کے دیگر حصوں میں تیز ہواؤں کے ساتھ بھاری سے بہت بھاری بارش کی پیش گوئی کی ہے ۔ آسام اسٹیٹ ڈیزاسٹر مینجمنٹ اتھارٹی (اے ایس ڈی ایم اے ) نے لوگوں سے اپیل کی ہے کہ وہ اس مدت کے دوران غیر ضروری سفر سے گریز کریں۔
