ڈیفنڈنگ چمپئن سری لنکا 214 کا ٹارگٹ حاصل نہ کرسکا، کل پاکستان کیساتھ ناک آؤٹ میچ
کولمبو:ہندوستان ایشیا کپ 2023 کے فائنل میں پہنچ گیا ہے۔ ٹیم نے اپنے دوسرے سوپر 4 میچ میں ڈیفنڈنگ چیمپئن سری لنکا کو 41 رنز سے شکست دی۔منگل کو کولمبو کے آر پریماداسا اسٹیڈیم میں انڈیا نے ٹاس جیت کر پہلے بیٹنگ کرتے ہوئے 213 رنز بنائے۔ جواب میں سری لنکن ٹیم 41.3 اوورز میں 172 رنز بنا کر آؤٹ ہو گئی۔214 رنز کے ہدف کے تعاقب میں آنے والی سری لنکن ٹیم کا آغاز خراب رہا۔ ٹیم تیسرے اوور میں پتھم نسانکا (6 رنز) کی وکٹ گنوا بیٹھی۔ کوسل مینڈس (15 رنز) نے اننگز کو سنبھالنے کی کوشش کی لیکن وہ بھی 7ویں اوور میں بمراہ کا شکار بن گئے۔ 8ویں اوور میں محمد سراج نے دیموتھ کرونارتنے (2 رنز) کو پویلین بھیجا۔ سری لنکا نے پہلے 10 اوورز میں 39 رنز بنانے کے بعد 3 وکٹیں گنوا دیں۔ٹیم انڈیا 213 رنز بنا کر 49.1 اوور میں آل آؤٹ ہو گئی۔ ون ڈے کی تاریخ میں پہلی بار ٹیم نے اسپنرز کے خلاف تمام 10 وکٹیں گنوائیں۔ سری لنکا کی جانب سے لیفٹ آرم اسپنر دونتھ ویلالج نے 5 اور آف اسپنر چارتھ اسالنکا نے 4 وکٹیں حاصل کیں۔ جبکہ دیگر اسپنر مہیش ٹیکشنا نے ایک وکٹ حاصل کی۔ہندوستانی کپتان روہت شرما نے سب سے زیادہ 53 رنز بنائے۔ روہت نے اپنے ون ڈے کیریئر کی 51 ویں ففٹی بنائی۔ انہوں نے 10 ہزار ون ڈے رنز بھی مکمل کر لیے۔ روہت کے علاوہ کے ایل راہول نے 39 اور وکٹ کیپر ایشان کشن نے 33 رنز کا تعاون دیا۔ اکشر اور سراج نے آخری وکٹ کے لیے 26 رنز کی شراکت داری کی۔ اب سری لنکا اور پاکستان کے درمیان 14 ستمبر کو ہونے والا میچ ناک آؤٹ جیسا ہوگا۔ کیونکہ دونوں ٹیموں کے 2-2 پوائنٹس ہیں، جو بھی ٹیم جیتے گی وہ 4 پوائنٹس کے ساتھ فائنل میں پہنچنے والی دوسری ٹیم بن جائے گی۔پاکستان اور سری لنکا کے درمیان میچ جیتنے والی ٹیم فائنل میں انڈیا کا سامنا کرے گی ۔بنگلہ دیش ہندوستان کے خلاف آخری میچ جیت کر بھی صرف 2 پوائنٹس حاصل کر سکے گا اس لیے وہ پہلے ہی خارج ہو چکا ہے۔