بنگلورو: وزیر اعظم نریندر مودی نے بنگلورو میں لڑاکا طیارے تیجس میں اڑان بھری ہے۔ انہوں نے ہفتہ (25 نومبر ) کو بنگلورو میں ہندوستان ایروناٹکس لمیٹڈ (ایچ اے ایل) کا دورہ کیا۔ پی ایم او کے مطابق وہ تیجس جیٹ کے مینوفیکچرنگ مرکز کا معائنہ کرنے آئے تھے۔مودی حکومت دفاعی مصنوعات کی مقامی پیداوار پر زور دے رہی ہے۔ انہوں نے اکثر اس بات کی نشاندہی کی ہے کہ کس طرح ان کی حکومت نے ہندوستان میں دفاعی آلات کی تیاری اور برآمد کو فروغ دیا ہے۔ وزیر اعظم نریندر مودی نے سوشل میڈیا پلیٹ فارم پر لکھا ہندوستانی فضائیہ، ڈی آر ڈی او اور ایچ اے ایل کے ساتھ ساتھ تمام ہندوستانیوں کو دلی مبارکباد۔کئی ممالک نے تیجس ہلکے لڑاکا طیارے کی خریداری میں دلچسپی ظاہر کی ہے اور امریکی دفاعی کمپنی جی ای ایرو اسپیس نے وزیر اعظم کے دورہ امریکہ کے دوران ایم کے۔دو تیجس کے لیے مشترکہ طور پر انجن تیار کرنے کے لیے ایچ اے ایل کے ساتھ ایک معاہدے پر دستخط کیے تھے۔ وزیر دفاع راج ناتھ سنگھ نے اس سال اپریل میں کہا تھا کہ مالی سال 2022/2023 میں ہندوستان کی دفاعی برآمدات 15920 کروڑ روپے کی بلند ترین سطح پر پہنچ گئی ہیں۔ فضائیہ نے ایچ اے ایل سے 123 تیجس طیاروں کا آرڈر دیا ہے جن میں سے 26 طیارے فراہم کر دیے گئے ہیں۔ یہ سب تیجس مارک۔1 ہیں۔ آنے والے دنوں میں، ایچ اے ایل ان طیاروں کے مزید اپ گریڈ شدہ ورژن فضائیہ کے حوالے کرے گا جو 2024 اور 2028 کے درمیان فراہم کیے جائیں گے۔
