ممبئی، 4 اگست (آئی اے این ایس) سابق لاک اَپ2 کی شریکِ مقابلہ اور ماڈل آکانکشا چودھری نے اپنی ماڈلنگ کے ابتدائی دنوں سے متعلق ایک چونکا دینے والا انکشاف کرتے ہوئے دعویٰ کیا ہے کہ انہیں کاسٹنگ کاؤچ کا سامنا کرنا پڑا تھا۔ایک حالیہ انٹرویو میں آکانکشا چودھری نے الزام لگایا کہ بیوٹی پیجینٹ انڈسٹری کی ایک سینئر شخصیت نے ان کے کیریئر کے آغاز میں مالی مدد اور پیشہ ورانہ ترقی کا لالچ دے کر ان سے جنسی تعلقات قائم کرنے کا مطالبہ کیا۔ آکانکشا کے مطابق، جب وہ ماڈلنگ کی مسابقتی دنیا میں اپنی جگہ بنانے کی کوشش کر رہی تھیں، اسی دوران مذکورہ شخصیت نے ان سے رابطہ کیا۔ ابتدا میں انہیں یقین دلایا گیا کہ ان کے خوابوں کو پوراکرنے اور مالی مشکلات دورکرنے میں ہر ممکن تعاون کیا جائے گا، لیکن بعد میں اس پیشکش کے ساتھ ایسی شرائط رکھی گئیں جنہیں وہ کسی بھی صورت قبول نہیں کر سکتی تھیں۔اداکارہ نے کہا ہے کہ اس واقعہ نے ان پر گہرا ذہنی اثر چھوڑا اور انہیں احساس ہوا کہ تفریحی اور فیشن انڈسٹری میں کامیابی حاصل کرنے کی خواہش رکھنے والی کئی نوجوان لڑکیوں کو اس قسم کے دباؤ اور نامناسب مطالبات کا سامنا کرنا پڑتا ہے۔انہوں نے کہا کہ انہوں نے اپنی عزتِ نفس پرکوئی سمجھوتہ نہیں کیا اور ایسے مطالبات کو صاف طور پر مسترد کردیا۔ ان کے مطابق، ہر نوجوان لڑکی کو اپنے خوابوں کی تکمیل کے لیے کسی بھی غیر اخلاقی شرط کو قبول کرنے کی ضرورت نہیں ہے۔آکانکشا چودھری نے اس بات پر زور دیا کہ کاسٹنگ کاؤچ جیسے مسائل پر کھل کر بات کرنا ضروری ہے تاکہ نئی آنے والی لڑکیاں محتاط رہیں اور انڈسٹری میں محفوظ ماحول کو فروغ دیا جا سکے۔ تاہم اداکارہ نے انٹرویو میں اس شخص کا نام ظاہر نہیں کیا اور نہ ہی اپنے الزامات کے حق میں کوئی عوامی ثبوت پیش کیا ہے۔ اس لیے ان دعوؤں کی آزادانہ طور پر تصدیق نہیں ہو سکی ہے، جبکہ متعلقہ فردکی جانب سے بھی تاحال کوئی ردِعمل سامنے نہیں آیا۔
