جے پور : راجستھان کے سابق وزیر اعلیٰ اور کانگریس کے سینئر لیڈر اشوک گہلوت نے کہا کہ وزیر اعظم نریندر مودی آیوشمان بھارت کو دنیا کی سب سے بڑی ہیلتھ انشورنس اسکیم کہہ کر روس میں واہ واہی حاصل کرنے کی کوشش کر رہے ہیں، لیکن سچائی یہ ہے کہ آیوشمان بھارت اسکیم کے تحت ملک میں صرف 40 فیصد کنبوں کو ہی 5 لاکھ روپے تک کے علاج کی سہولت ملتی ہے جو کہ سنگین بیماریوں کے علاج کے لیے ناکافی ہے ۔ گہلوت نے منگل کو اپنے بیان میں یہ بات کہی۔ انہوں نے کہا کہ ہماری حکومت نے راجستھان میں چرنجیوی یوجنا کے ذریعے ریاست کے تمام لوگوں کو 25 لاکھ روپے تک کیش لیس علاج اور 10 لاکھ روپے کا حادثہ انشورنس کی سہولت فراہم کی تھی۔ تاہم، موجودہ بی جے پی حکومت نے اس اسکیم کو بہتر بنانے کے بجائے اسے روک دیا ہے ۔ انہوں نے کہا کہ بھارتیہ جنتا پارٹی (بی جے پی) کے قول و فعل میں یہی فرق ہے ۔
