ارکان اسمبلی کونااہل قرار دینے سے اسپیکر کا انکار‘شردپوار کو جھٹکہ
ممبئی :مہاراشٹرا کے اسپیکر نے اجیت پوار گروپ کے ارکان اسمبلی کو نااہل قرار دینے کی درخواست مسترد کردی۔مہاراشٹر اسمبلی کے اسپیکر راہول نارویکر نے جمعرات کو اجیت پوار گروپ سے تعلق رکھنے والے ایم ایل ایز کو حقیقی نیشنلسٹ کانگریس پارٹی قرار دیا۔این سی پی میں دو گروپس کی طرف سے ایک دوسرے کے خلاف دائر کی گئی نااہلی کی درخواستوں پر فیصلہ سناتے ہوئے اسپیکر نے کہا کہ اجیت پوار کا گروپ ریاستی مقننہ میں شرد پوار کے گروپ سے کافی زیادہ ہے۔ انہوں نے کہا کہ وہ سمجھتے ہیں کہ اجیت پوار کے گروپ کو این سی پی میں زبردست اکثریت حاصل ہے۔ اسپیکر نے فیصلہ دیا کہ گزشتہ سال 30 جون اور 2 جولائی کے درمیان اجیت پوار کے گروپ کی کارروائیاں اور بیانات انحراف کی کارروائیاں نہیں تھے بلکہ پارٹی کے درمیان اختلاف رائے تھے۔نارویکر نے کہا کہ ہندوستان کے آئین کے دسویں شیڈول کی دفعات، جو انحراف کی بنیاد پر قانون سازوں کو نااہل قرار دینے سے متعلق ہے کا استعمال اراکین کو خاموش کرنے یا اپوزیشن کو کچلنے کیلئے نہیں کیا جانا چاہیے۔انہوں نے کہا کہ یہ قانون کا سراسر غلط استعمال اور قانون کے تنازعہ کے منافی ہوگا۔اس مہینے کے شروع میں الیکشن کمیشن نے فیصلہ دیا تھا کہ مہاراشٹر اکے نائب وزیر اعلیٰ اجیت پوار کی قیادت میںگروپ کو این سی پی کا نام اور اس کی گھڑی کا نشان وراثت میں ملے گا جس سے عام انتخابات سے چند ماہ قبل پارٹی کے سرپرست شرد پوار کو ایک دھچکا لگے گا۔کمیشن کا خیال ہے کہ درخواست گزار اجیت اننت راؤ پوار کی قیادت میں گروپ ہی نیشنلسٹ کانگریس پارٹی (این سی پی) ہے۔
اور انتخابی نشان (ریزرویشن اور الاٹمنٹ) آرڈر کے مقاصد کیلئے اپنا نام اور مخصوص نشان ‘گھڑی’ استعمال کرنے کا حقدار ہے۔
