شہید ویر نارائن سنگھ نگر (رائے پور): کانگریس کی اسٹیئرنگ کمیٹی نے پارٹی ورکنگ کمیٹی کے ارکان کے انتخاب کا حق پارٹی صدر کو سونپنے کا فیصلہ کیا ہے ۔کمیٹی کی میٹنگ کے بعد پارٹی کے محکمہ مواصلات کے سربراہ جے رام رمیش نے صحافیوں کو یہ معلومات دیتے ہوئے کہا کہ کمیٹی نے متفقہ طور پر یہ فیصلہ نوجوانوں، خواتین، دلتوں اور اقلیتوں کی نمائندگی کو محفوظ بنانے اور یقینی بنانے کے لیے کیا ہے ۔انہوں نے کہا کہ کمیٹی نے پارٹی آئین کی 16 دفعات اور 32 قواعد میں ترمیم کو منظوری دی ہے ۔ جس پر سبجیکٹ کمیٹی غور کرے گی۔ انہوں نے بتایا کہ کمیٹی کی طرف سے منظور شدہ دفعات میں سابق وزیر اعظم اور پارٹی کے سابق صدور کو مستقل طور پر ورکنگ کمیٹی میں شامل کیا جانا ہے ۔انہوں نے کہا کہ کمیٹی کی میٹنگ میں 45 ممبران موجود تھے ۔اس میٹنگ میں گاندھی خاندان کے افراد کی عدم موجودگی پر کسی نے کوئی تبصرہ نہیں کیا۔ رمیش نے سوالوں کے جواب میں کہا کہ کمیٹی نے الیکشن کرانے اور نہ کرانے کے بارے میں سوچا، کچھ ممبران الیکشن کے حق میں تھے جبکہ کچھ اس کے خلاف تھے۔
