بینک کاک ۔ 28 جولائی (ایجنسیز) ملائیشیائی وزیر اعظم انور ابراہیم نے اعلان کیا ہے کہ تھائی لینڈ اور کمبوڈیا غیر مشروط جنگ بندی پر متفق ہوگئے ہیں۔ غیر ملکی میڈیا کے مطابق ملائیشیائی وزیر اعظم انور ابراہیم نے دونوں ممالک کے درمیان جنگ بندی کا اعلان کیا، یہ جنگ بندی آج رات سے شروع ہوگی۔ انور ابراہیم نے بتایا کہ امن کی بحالی اور اعتماد سازی کے لیے یہ پہلا قدم ہوگا۔ ملائیشیائی وزیراعظم کا کہنا تھا کہ امریکی صدر ڈونالڈ ٹرمپ نے دونوں رہنماؤں سے پرامن حل تلاش کرنے کی اپیل کی تھی۔ دونوں فریقوں نے براہ راست رابطہ بحال کرنے پر اتفاق کیا ہے۔ اس دوران کمبوڈین وزیراعظم نے کہا کہ مذاکرات اچھے رہے، امید ہے کہ فوری طور پر لڑائی کو روک دیا جائے گا۔ جھڑپوں کے دوران 3 لاکھ سے زائد لوگ بیگھر ہوئے۔ واضح رہے کہ اس تنازعہ میں اب تک 33 افراد ہلاک ہوئے جبکہ دونوں اطراف میں متعدد لوگوں کو نقل مکانی کرنا پڑی تھی۔
