جالندھر: پنجاب کے جالندھر میں پولیس نے بین الاقوامی منشیات اسمگلنگ گینگ کیس میں ایک اہم کامیابی حاصل کرتے ہوئے 22 کلوگرام افیون کے ساتھ نو اسمگلروں کو گرفتار کیا ہے ۔یہ کامیابی پولیس کمشنر سوپن شرما کی قیادت میں منشیات کی بین الاقوامی اسمگلنگ کیس میں حاصل کی گئی۔ پولیس کمشنر نے اتوار کو کہا کہ مکمل جانچ کی بنیاد پر جھارکھنڈ کے رہائشی ابھی رام عرف ایلکس کو رانچی سے 12 کلو افیون کے ساتھ گرفتار کیا گیا ہے ۔ اسی طرح جالندھر کے منی، پون اور سکندر اور ہوشیار پور کے بلیہار کو پانچ کلو افیون، تین گاڑیوں اور پیکیجنگ مواد کے ساتھ گرفتار کیا گیا ہے ۔پولیس کمشنر نے کہا کہ ان چاروں کی اپنی کورئیر کمپنیاں/فرمیں تھیں جو افیون کو اکٹھا کرنے ، پیک کرنے اور دہلی کسٹمز کو کوریر کرنے میں شامل تھیں۔ انہوں نے کہا کہ یہ لوگ برطانیہ، امریکہ، آسٹریلیا اور کینیڈا میں قائم پانچ غیر ملکی تنظیموں سے افیون کے پیکٹوں کی تقسیم کے مقام کی تفصیلات حاصل کرتے تھے ۔مسٹر شرما نے کہا کہ جالندھر کی امرجیت کور اور سنی کو گرفتار کیا گیا ہے ۔ وہ حوالہ کے ذریعے ملک میں منشیات کی رقم کی تقسیم میں شامل تھے ۔انہوں نے کہا کہ منشیات کی رقم لے جانے کے لیے استعمال ہونے والی گاڑی بھی ان کے پاس سے ضبط کر لی گئی ہے اور ویسٹرن یونین آپریٹر امیت شکلا کو بھی پھگواڑہ سے گرفتار کیا گیا ہے ۔ وہ پنجاب، جھارکھنڈ اور دہلی میں حوالہ لین دین میں ملوث تھا، جہاں بیرون ملک سے منشیات کی رقم آپریٹرز میں تقسیم کی جاتی تھی۔ انہوں نے کہا کہ دہلی کے پرمود کو دہلی کسٹم حکام کے ساتھ ملی بھگت کے الزام میں گرفتار کیا گیا ہے ۔
