نئی دہلی: سپریم کورٹ نے کالجیم کے معاملے پر کل ایک اہم تبصرہ کیا۔ سپریم کورٹ نے کہا کہ جو نظام کام کر رہا ہے اسے پٹڑی سے نہ اتارا جائے۔ کالجیم کو اپنا کام کرنے دیں۔ ہم سب سے شفاف ادارہ ہیں۔ کالجیم کے سابق ممبران کے لیے فیصلوں پر تبصرہ کرنا اب فیشن بن گیا ہے۔ جسٹس ایم آر شاہ اور جسٹس سی ٹی روی کمار کی بنچ نے یہ ریمارکس آر ٹی آئی کارکن انجلی بھردواج کی عرضی پر کہے۔انجلی بھاردواج نے دہلی ہائی کورٹ کے فیصلے کو سپریم کورٹ میں چیلنج کیا ہے، جس نے آر ٹی آئی ایکٹ کے تحت 12 دسمبر 2018 کو سپریم کورٹ کالجیم کی میٹنگ کے ایجنڈے، تفصیلات اور حل طلب کرنے والی عرضی کو مسترد کر دیا تھا۔ سماعت کے دوران پرشانت بھوشن نے عرضی گزار کی طرف سے پیش ہوتے ہوئے کہا کہ کیا کالیجیم کے فیصلے آر ٹی آئی کے تحت جوابدہ ہیں؟ یہی سوال ہے۔ کیا اس ملک کے عوام کو جاننے کا حق نہیں؟ عدالت نے خود کہا تھا کہ آر ٹی آئی ایک بنیادی حق ہے۔ اب سپریم کورٹ پیچھے ہٹ رہی ہے۔جسٹس شاہ نے جواب دیا، اس کالجیم میٹنگ میں کوئی قرارداد پاس نہیں ہوئی۔ ہم سابق ممبران کی طرف سے کہی گئی کسی بھی بات پر تبصرہ نہیں کرنا چاہتے۔ اب کالجیم کے سابق ممبران کے لیے فیصلوں پر تبصرہ کرنا فیشن بن گیا ہے۔ ہم سب سے شفاف ادارہ ہیں۔ ہم پیچھے نہیں ہٹ رہے ہیں۔ بہت سے زبانی فیصلے لیے جاتے ہیں۔ جس کے بعد سپریم کورٹ نے فیصلہ محفوظ کر لیا۔
