مکہ معظمہ :خانہ کعبہ کو انتہائی بیش قیمت خوشبوؤں سے معطر کرنے کی روایت صدیوں پرانی ہے جسے آج الحرمین الشریفین کی جنرل پریذیڈینسی کی جانب سے بھی پورے اہتمام کے ساتھ جاری رکھا گیا ہے۔محقق اور مسجد حرام میں تاریخ و آداب کے ماہر عبداللہ الحسنی الزھرانی نے العربیہ ڈاٹ نیٹ سے بات کرتے ہوئے کہا کہ خانہ کعبہ کو معطر کرنے کا عمل پرانا ہے اور اسلام سے پہلے سے جاری ہے۔ پرانے زمانوں میں مکہ کے حکمران اور قبائلی سردار خانہ کعبہ اور اس کے اطراف کی عطربیزی میں سبقت لے جانے کی کوشش کرتے۔انہوں نے بتایا کہ پیغمبر اسلام حضرت محمد صلی اللہ علیہ وسلم نے فتح مکہ کے بعد خانہ کعبہ کو معطر کرنے کا عمل جاری رکھنے کا فرمان جاری کیا۔حضرت امیر معاویہ رضی اللہ عنہ ہر نماز کے وقت خانہ کعبہ میں عطر کا چھڑکاؤ کراتے۔ عبداللہ بن زبیر رضی اللہ عنہ بھی روزانہ خانہ کعبہ میں عطر کا چھڑکاو کراتے اور جمعہ کے روز خانہ کعبہ کو اندر اور باہر سے زیادہ مقدار میں عطر بیزی کراتے۔انہوں نے کہا کہ خانہ کعبہ کے لیے استعمال ہونے والا عطر مقدس مقام کے کسی بھی دوسرے مقام کے عطر سے مختلف ہوتا ہے۔ حجر اسود کے لیے استعمال ہونے والا عطر پتھر کو متاثر نہیں کرتا۔ اسی طرح رکن یمانی اور الملتزم کے لیے الگ الگ عطر ہیں۔ غلاف کعبہ کا عطر الگ ہوتا اور خانہ کعبہ کو غسل دینے کے لیے طائف کے گلاب کے پھولوں کا عرق استعمال کیا جاتا ہے۔
