بنگلورو۔ معزول جے ڈی (ایس) کے ریاستی صدر سی ایم ابراہیم نے عہدے سے برطرفی کو چیلنج کیا اور سابق وزیر اعظم دیوے گوڑا کو نتائج کا سامنا کرنے کے لیے تیار رہنے کی تنبیہ کی۔ انہوں نے کہا کہ میں جلد ہی کرناٹک ہائی کورٹ اور الیکشن کمیشن سے رجوع کروں گا۔ برطرفی کے فیصلے کے اعلان کے بعد جمعرات کو بنگلورو میں نامہ نگاروں سے بات کرتے ہوئے ابراہیم نے دیوے گوڑا کو مخاطب کرتے ہوئے کہا میں صدر ہوں اور آپ مجھے بے دخل نہیں کر سکتے۔ حکم امتناعی کے لیے الیکشن کمیشن اور ہائی کورٹ سے رجوع کروں گا۔ جب تک معاملہ عدالت میں حل نہیں ہو جاتا، وہ ایسا نہیں کر سکتے۔ انہوں نے کہا کہ انہیں جے ڈی (ایس) پارٹی کے ریاستی صدر کے عہدے سے ہٹانا ممکن نہیں ہے۔ ان کے پاس مجھے بے دخل کرنے کی طاقت نہیں ہے۔ جے ڈی (ایس) کے دستور کے مطابق، پارٹی کے تین چوتھے ارکان کو مجھے ایک میٹنگ بلانے کے لیے نوٹس جاری کرنا چاہیے۔ ایک بار جب میں میٹنگ بلاؤں تو وہاں عدم اعتماد کی تحریک لانی پڑتی ہے۔ یہی طریقہ کار ہے انہوں نے کہا۔
